न्हूगु संविधानया नां - 'नेपाःया संविधान'

च्यागू विषयलय् सहमति, आः नीनिगू विषय ल्यँ दनी

संविधानसभा मार्फत जारी यायेत्यंगु न्हूग संविधानया नां 'नेपाःया संविधान' (नेपालको संविधान) तयेगु सहमति जूगु दु । ताः ई न्ह्यः निसें संविधानया नांमय् जुयाच्वंगु विवादयात अन्ततः थौं च्वंगु संवैधानिक समिति अन्तर्गतया उपसमितिं सहमति याःगु खः ।

संविधानया नांया सम्बन्धय् थीथी राजनीतिक दलं थःथःगु हे नां प्रस्ताव यानाच्वंगुलिं ताः ई न्ह्यः थुगु विषयलय् विवाद जुयाच्वंगु खः । सिंहदरवारस्थित राज्य व्यवस्था समितिया कार्यकक्षय् च्वंगु मुँज्यां 'संघयी लोकतान्त्रिक गणतन्त्र' च्वयेगु वा मच्वयेगु विषय धाःसा राज्यया मौलिक अधिकार व निर्देशक सिद्धान्त समितिया प्रतिवेदनं क्वचायेकेगु सहमति नं याःगु दु ।

अथेहे थौंया मुँज्यां न्हूगु संविधानय् माओवादी लडाकु सम्बन्धी छुं नं खँ उल्लेख मयायेगु सहमति या:गु दु । न्हू संविधान निर्माण जुइ न्ह्य: हे शान्ति प्रक्रिया क्वचाइगुलिं संविधानय् माओवादी लडाकुया बारे छुं नं उल्लेख मयायेगु सहमति या:गु ख: । थ्वस्वां न्ह्य: माओवादीं जनमुक्ति सेना च्वयेमा:गु अडान कयाच्वंगु ख: ।

संविधानया नांमय् खुगू थीथी विषयलय् विवाद जुयाच्वंगु खः । थौंया मुँज्यां उगु फुक्कं खुगू बुँदाय् सहमति याःगु दु । संविधान निर्माणया झ्वलय् स्वीगू विषयलय् विवाद जुयाच्वंगु खःसा थौं संविधानया नां सम्बन्धी खुगू सहित च्यागू विषयलय् विवाद ज्यनेवं आः नीनिगू विषयलय् सहमति जुइ ल्यँ दनी । अझ नं शासकीय स्वरुप, निर्वाचन प्रणाली, राज्यया पुनर्संरचना थज्याःगु महत्वपूर्ण विषयलय् दलत दथुइ विवाद दनी ।

News Location: