सहमति जुटे यायेत प्रमं कांग्रेस सभापति नापलात
सरकारं संविधानसभाया म्याद दच्छिया निंतिं थप यायेगु प्रस्ताव संसदीय सचिवालय् दर्ता यायेवं प्रधानमन्त्री झलनाख खनालं उकि सहमति जुटे यायेत राजनीतिक नापलायेगु ज्या तीव्र यानादीगु दु ।
थीथी राजनीतिक दलया नेतात नापलायेत व्यस्त प्रधानमन्त्री खनालं थौं नेपाली कांग्रेसया सभापति सुशील कोइरालायात नापलानादीगु दु । कोइरालाया महाराजगञ्जस्थित छेँय् थ्यंकाः प्रधानमन्त्री खनालं म्याद थप यायेगु विषयलय् ग्वाहालि यायेत इनाप यानादीगु खः । वय्कलं वर्तमान सरकार शान्ति व संविधान निर्माण प्रक्रियायात निष्कर्षतय् थ्यंकेत दृढ दुगु जानकारी बियादीगु खः ।
उगु इलय् सभापति कोइरालां शान्ति प्रक्रिया पूवनीगु व संविधान निर्माण जुइगु आधार मदयेकं कांग्रेस म्याद थपया पक्षय् मदुगु लिसः बियादीगु खः । वय्कलं कांग्रेसं न्ह्यब्वःगु प्यंगू बुँदे सर्त कार्यान्वयन जूसां थःपिं म्याद थप पक्षय् सहमति यायेमफइगु लिस: बियादीगु खः ।
