शान्ति प्रक्रिया बारे स्वंगू दलया बैठक
येँ (सन्ध्या टाइम्स)/संविधान निर्माणय् वने न्ह्यः तयार यायेमाःगु शान्ति प्रक्रियाया खाका सरकारं दयेके सिधयेकूगु दु। यदि शान्ति प्रक्रियाया पूरा खाका न्ह्यःने मवल धाःसा संविधानसभाया म्याद थपे याये मखु धकाः नेपाली कांग्रेसं ख्याच्वः बीगु शुरु यायेवं माओवादीं चांचां हे बैठक च्वनाः उगु खाका तयार याःगु खः ।
सूत्रं बिउगु जानकारी कथं सरकारय् दुथ्याःगु तःधंगु स्वंगू दल माओवादी, एमाले व मधेसी फोरमया शीर्ष नेतात म्हिगः बैठक च्वनाः माओवादीं तयार याःगु शान्तिया प्रस्ताव अध्ययन याःगु खः। स्वंगुलिं दलं उकियात स्वीकार याःगुलिं आः उकियात याकनं हे जारी यायेगु खँ धाःगु दु। तर उकियात प्रमुख प्रतिपक्षी नेपाली कांग्रेसं स्वीकार याइगु खः वा मखु धइगु खँ धाःसा सी मदुनि ।
माओवादीं फुक्कफाकं यानाः २०,००० संख्याया बिस्कं फोर्स दयेकेगु व उकी माओवादीया १०,००० लडाकु दुथ्याकेगु प्रस्ताव न्ह्यःने हःसां कांग्रेसं ५,००० म्ह जक लडाकु तये फइ धाःगु दु। धाथें गुलि लडाकु तयेगु धइगु खँ नेपाली सेनालिसे खँ ल्हायेधुंकाः तिनि सी दइ धाःगु दु ।
