'बाबुरामयात स्यायेगु योजना दयेकूगु हे जुयाच्वन'
येँ (सन्ध्या टाइम्स)/माओवादीया उपाध्यक्ष डा. बाबुराम भट्टराईयात स्यायेगु धकाः धम्की वःगु वास्तवय् हल्ला जक मखु, वय्कःयात स्यायेगु लागिं पार्टीया छगू पुचलं योजना नापं दयेकाच्वंगु जुयाच्वन ।
पार्टी प्रवक्ता दिनानाथ शर्मां नकतिनि छगू वक्तव्य पिकयाः थ्व खँ स्वीकार याःगु दु। पार्टी दुने प्रतिक्रियावादीत तसकं घुसे जुयाः थःहे नेतातय्त स्यायेगु तकया ग्वसाः दयेकाच्वंगु खँय् वक्तव्यय् दुःख नं प्वंकातःगु दु। थ्व घटनापाखें पार्टी दुने प्रतिक्रियावादीत तसकं दुने थ्यंक हे घुसपैठ जुयाच्वने धुंकूगु खः ला धइगु न्ह्यसः नं पिहां वःगु दु धकाः नं वक्तव्यय् धयातःगु दु ।
तर पार्टी दुने थज्याःगु तक घटना जुल धकाः स्वीकार यानाः नं अथे धम्की बिउपिंत छु कारवाही यायेगु धइगु खँय् धाःसा छुं नं मधाःगुलिं बाबुराम पक्षीय कार्यकर्तात तम्वयाच्वंगु दु। डा. भट्टराईयात स्यायेगु धकाः ख्याच्वः बिउपिंत कारवाही यायेमाः धइगु माग यासें भट्टराई समर्थक कार्यकर्तातय्सं म्हिगः पार्टीया मू ज्याकुथी धर्ना बिउगु खःसा थौं नं भर्ना बीगु ज्याझ्वः दु। उखे भट्टराईया चुनाव क्षेत्र गोरखाय् नं थ्व घटनाया विरोधय् कार्यकर्तातय्सं कोणसभा समेत याःगु दु ।
भट्टराई पक्षीय नेता राम कार्कीं थःपिंसं छुं न्हि स्वये, यदि पार्टीं कारवाही मयात धाःसा केन्द्रीय कमिटीया बैठक सःताः जूसां थुकिया बारे सहलह ब्याके बी धयादीगु दु। धम्की बिउपिं कार्यकर्तात खुल्ला चाःहिलाच्वंगु खँय् नं आपत्ति प्वंकूगु दु ।
धम्की बिउम्हेसिया धापू
म्हीग पार्टी कार्यालयय् च्वनाः डा. बाबुरामयात स्यायेगु धकाः धम्की बिल धाःम्ह कार्यकर्ता जनक बर्तौलां धाःसा थम्हं भट्टराईयात अथे धम्की बियागु हे मखु धाःगु दु। थः हे नेतायात स्यानां थःत छु दइ धासें बर्तौलां थ्व भट्टराईया चर्चाय् वयेगु तरिका जक खः धाःगु दु। कार्यकर्तां धाःसा वयात ज्वनेत माग यानाच्वंगु दु ।
