न्हापांगु गौतम बुद्ध शान्ति सिरपाः लःल्हात
लुम्बिनी (सन्ध्या टाइम्स)/नेपाल सरकारं नीस्वंगु नेपाःया हे न्हापांगु अन्तर्राष्ट्रियस्तरया शान्ति सिरपाः म्हिगः छगू ज्याझ्वःया दथुइ राष्ट्रपति डा. रामवरण यादवं लःल्हानादिल ।
गौतम बुद्ध अन्तर्राष्ट्रिय शान्ति सिरपाः नां तयाः पलिस्था याःगु उगु सिरपाः थुगुसी न्हापांखुसी निक्वःगु विश्वयुद्धय् आणविक बमं कयाः ध्वस्त जूगु जापानया निगू शहर हिरोशिमा व नागासाकीया पुलांपिं मेयरपिं छसिकथं डा. तादातोसी व तोमिहिसा ताउयात लःल्हाःगु खः। सिरपाः लःल्हानाः कायेत वय्कःपिं निम्हं लुम्बिनी झाःगु खः। ५० हजार अमेरिकी डलरया उगु सिरपाः निम्हेसितं मंकाः कथं इना बिउगु खः ।
ज्याझ्वलय् न्ववासें राष्ट्रपति डा. यादवं नकतिनि हे तःधंगु भुखाय् व सुनामी वयाः जापानय् जूगु तःधंगु धनजनया क्षति प्रति दुःख प्वंकुसें उगु विपत्तिपाखें जापान याकनं मुक्त जुइमा धकाः प्रार्थना यानादिल ।
वय्कलं विश्वय् ल्वाभः मुंकेगु धेंधेंबल्लाःयात म्हो यानाः विश्वयात निरस्त्रीकरण याना यंकेगु ज्याय् भगवान बुद्धं प्रतिपादन यानाबिज्याःगु शिक्षां तःधंगु योगदान बीगु आशा नं प्वंकादिल ।
लुम्बिनी विकास कोषया ग्वसालय् जूगु उगु ज्याझ्वलय् उपराष्ट्रपति परमानन्द झां सिरपाः त्याकादीपिं निम्हं व्यक्तित्वयात सुभाय् बियादिल ।
म्हिगः लुम्बिनीइ बुद्ध जयन्तीया लसताय् शान्ति यात्रा पिकायेगु लिसें बुद्ध पुजा व लुम्बिनी लागाय् बहनी मत च्याकाः दिपावलीया ज्या नं जूगु खः ।
