चित्लांगय् न्हापांगु बुद्ध जयन्ती ज्याझ्वः

येँ (सन्ध्या टाइम्स)/नेपाःया पुलांगु वस्ती चित्लाङ्गय् म्हिगः न्हापांखुसी बुद्ध जयन्ती न्यायेकेगु ज्या जुल। नेपाःया परम्परागत बौद्ध धर्म संघ नकबही यलया ग्वसालय् उगु ज्याझ्वः जूगु खः। ज्याझ्वलय् राम शाक्य व सानुशोभा शाक्यपाखें ढलोटया १८ इंची दुम्ह शाक्यमुनि बुद्ध प्रतिमा उपहार बिउगु खः। उगु हे ज्याझ्वलय् नेपाल परम्परागत प्रवचन संघ ख्वपया पुष्परत्न शाक्यं प्रवचन बियादीगु खः। लिसें चिनिकाजी बज्राचार्य, हेरारत्न बज्राचार्य, बोधिराज बज्राचार्य व आशामाया बज्राचार्यपिंसं सप्तविधानुत्तर पूजा यानादीगु खः। ज्याझ्वःया व्यवस्थापन परम्परागत इन्भेष्टमेन्टपाखें खेमराज शाक्यं यानादीगु खः ।

लिच्छिविकालय् व्यापार व्यवसायय् वनेगु मू लँपुकथं विकास जुयाच्वंगु स्वनिगःया प्यंगू भञ्ज्याङ्गमध्ये चन्द्रागिरि भञ्ज्याङ्ग थन हे लाः। थानकोटं १६ कि.मि. तापाक ८२८९ फिट तजाःगु चन्द्रागिरि पर्वत अर्थात मिलंचो पर्वतया मुलय् दिनाच्वंगु पुलांगु वस्ती खः चित्लाङ्ग। चित्लाङ्ग शब्दया ब्यूत्पत्ति स्वयेगु खःसा तौख्यःया संवत् ३७ या अभिलेखय् 'चुस्तुङ्गग्राम' उल्लेख जुयाच्वंगु दुसा त्रिभुवन विश्वविद्यालयय् संग्रहित ने.सं. ७९८ या ताडपत्रय् 'चेत्लाङ्ग' व किपूया नारायण देगःया ने.सं.१००० या अभिलेखय् 'चैत्लाङ्ग' उल्लेख जुयाच्वंगुलिं थ्व खँग्वःया शुरु रुप 'चैत्यलाङ्ग', वयां लिपा 'चैत्लाङ्ग' जुयाः आः 'चित्लाङ्ग' जूवंगु अनुमान भाषाविद्तय्सं याः।
चित्लाङ्गया अशोक चैत्य सुनां गबलय् पलिस्था यात धइगु खँ सी मदुनि। अथे हे कुन्छा धाराया ने.सं. ८३३ या अभिलेखय् १७ म्ह दुजःपिं मुनाः चैत्यय् गजू व अक्षोम्य बुद्ध पलिस्था यानातःगु नापं हिति दयेका तःगु खँ नं उल्लेख जुयाच्वंगु दु ।