संसदीय समितिं प्रम खनालनाप स्पष्टिकरण काइगु
व्यवस्थापिका संसद अन्तर्गतया महिला, बालबालिका व समाज कल्याण समितिं राज्यया फुक्कं निकायलय् मिसातय् ३३प्रतिशत सहभागिता सुनिश्चित यायेगु विषयलय् कन्हय् प्रधानमन्त्री झलनाथ खनालनाप स्पष्टिकरण काइगु जूगु दु ।
प्रधानमन्त्री खनालयात थौं हे स्पष्टिकरणया निंतिं सःतुगु खःसां वय्कः कार्यव्यस्तताया हुनिं उपस्थित जुइमफुगुलिं कन्हय्या मुँज्या स्पष्टिकरण कायेगु निर्णय याःगु खः । सिंहदरवारय् थौं च्वंगु संसदीय समितिया मुँज्याय् मुख्य सचिव माधवप्रसाद घिमिरें धाःसा स्पष्टिकरण बियादीगु खः ।
स्पष्टिकरण बीगु झ्वलय् मुख्य सचिव घिमिरें निजामति सेवा ऐन लगायता क्षेत्रय् नियमावली संशोधन यानाः राज्यया फुक्कं निकायलय् मिसा, आदिवासी जनजाति, दलित लगाया प्रतिनिधित्व सुनिश्चित यायेगु व्यवस्था यायेधुंकूगु जानकारी बियादिल ।
वय्कलं थुकियात पूर्णरुपं कार्यान्वयन यायेत राजनीतिक तहलय् सहलह जुइमाःगु धयादिसें न्यादँया दुने फुक्कं समुदायया समावेशी प्रतिनिधित्व जुइगु प्रक्रिया पूवनीगु धयादिल ।
मुँज्याय् समितिया दुजःतय्सं राज्यया फुक्कं निकायलय् मिसातय्त ३३प्रतिशत प्रतिनिधित्व यायेगु विषलय् सरकारया स्पष्ट धारणा वयेमाःगु खँ बः बिउगु खः ।
