कांग्रेसया प्रस्ताव माओवादीयात ख्यायेगु चाल : प्रकाश
एनेकपा (माओवादी)या न्वकु नारायणकाजी श्रेष्ठ 'प्रकाशं' नेपाली कांग्रेसं न्ह्यब्वःगु सेना समायोजनया प्रस्ताव माओवादीयात ख्यायेगु चाल जक जूगु खँ धयादीगु दु । वय्कलं धयादिल, 'थुगु प्रस्ताव माओवादीयात ख्यायेगु उदेश्यं हःगु खः ।'
रिपोटर्स क्लबं बुधवाः येँय् याःगु छगू साक्षात्कार ज्याझ्वलय् नेता प्रकाशं कांग्रेसया प्रस्ताव अव्यवहारिक व असान्दर्भिक जूगु धयादिसें उगु प्रस्तावय् सहमतिया सम्भावना मदुगु धयादिल । वय्कलं कांग्रेसं हःगु प्रस्ताव शान्ति व संविधानया सुनिश्चितताया निंतिं मवःगु दावी नं यानादिल ।
कांग्रेसं मंगलवाः माओवादी लडाकुयात सुरक्षा निकायलय् व्यक्तिगत रुपय् मापदण्ड पूवंकाः जक समायोजन यायेमा:गु, समायोजनय् वनीगु ल्याः क्वःछीमाःगु, समायोजनया मोडालिटि तयार यानाः जेठ १० गते दुने लडाकुया रिग्रुपिङ यायेगु व ल्वाभः सरकारयात लःल्हायेमाःगु सर्त न्ह्यने हःगु खः ।
संविधानसभाया म्याद थपया विकल्प मदुगु दावी यानादिसें नेता प्रकाशं राजनीतिक दलया नेतातय्सं नेपाली जनतायात क्षमा फ्वनाः शान्ति व संविधान सुनिश्चितताया आधार सहित प्रतिबद्धता प्वंकेमाःगु धयादिल ।
