संसद पिनें वयेत्यंगु सरकार

माओवादीपाखें सदन अवरुद्ध यानाच्वंगु कारणं सरकार गठन यायेगु ज्या हे सदनं पिने च्वनाः यायेगु खः लाकि धइगु बिचाः न्ह्यःने वयाच्वंगु दु । खास यानाः एमाले व कांग्रेस समर्थित कानूनविद्तय्सं सभामुखया विशेषाधिकार प्रयोग यानाः सदनं पिने हे सरकार गठन याःसां जिउ धइगु ँसुझाव’ बियाच्वंगु दु । माओवादीया संसद अवरुद्ध नापनापं सदनं पिने हे सरकार गठन यायेगु थज्याःगु सुझाव नं नापनापं वयाच्वंगुलिं थुकिं धाथेंया संसदवादीतय्त चिन्तित याना बिउगु दु ।

खतुं आः तक अज्याःगु सुझावयात सभामुख सुभाष नेम्बाङं सही अभ्यास मखु धकाः विरोध हे यानाच्वंगु कारणं कानूनविद्तय्सं सुझाव बिउसां लागू जुइगु सम्भावना मदु । अथे खःसां सरकार गठन यायेगु थेंज्याःगु सवाल दुगुलिं वय्कःया थःहे पार्टीं वय्कःयात दवाव बीगु खतरा धाःसा दु । पार्टी व सभामुख कचवं जुयाः भारतय् माक्स्रवादी सभामुख सोमनाथ चटर्जीयात पार्टीं हे निष्काशन याःगु घटना पुलां मजूनि । राजनीतिक पार्टीतय्सं थःगु स्वार्थया लागिं स्वतन्त्र जुइमाःम्ह सभामुखयात नं दवाव बियाः लँ लीकेगु ज्या यायेफु । राष्ट्रपति डा। रामवरण यादवं थःगु मातृ पार्टी नेपाली कांग्रेसया हे दवावं असंवैधानिक पलाः छिउगु ला सकस्यां खंगु हे खँ जुल । थःपिनि असन्तुष्टि संसद दुने प्वंकेगु व जबर्जस्ती याःसा संसद अवरुद्ध यायेगु राजनीतिक पार्टीतय्गु 'अधिकार’ हे खः । माओवादीं नं वहे अधिकार छ्यलाः संसद अवरुद्ध यानाच्वंगु खः । यदि उकियात छले यानाः संसदं पिने गतिविधि जुल धाःसा संसद धइगु हे आवश्यक मजुइगु खतरा ब्वलनी ।

More Stories Like this