आः विदेशीतय्त नं नेपालभाषा स्यनीगु
यल (सन्ध्या टाइम्स) नेपालभाषा केन्द्रीय विभागं नेपाली बाहेक गैरनेपालीतय्त नं नेपालभाषा स्यनीगु जूगु दु । केन्द्रीय विभागय् थौं सुथय् स्वलाया नेपालभाषा प्रशिक्षण ज्याझ्वःया समापन ज्याझ्वलय् न्ववासें केन्द्रीय विभागया पुलांम्ह प्रमुख व प्रशिक्षक प्रा. डा. सुन्दरकृष्ण जोशीं आः थ्व कक्षायात निरन्तर न्ह्याका यंकेगु खँ कनादिल । उकी विद्वान व्यक्तित्विपं सत्यमोहन जोशी, बलदेव जुजु, त्रिरत्न मानन्धर मदनसेन बज्राचार्य, आदिपिंसं नं क्लास कयादीगु खः ।
विभाग प्रमुख प्रेमशान्ति तुलाधरया सभापतित्वय् जूगु ज्याझ्वलय् मूपाहां त्रिविविया पुलांम्ह उप- कुलपति व विश्वविद्यालय अनुदान विभागया प्रमुख प्रा.डा.कमलकृष्ण जोशीं झिंप्यम्ह सहभागीपिंत दसिपौ लःल्हानादिल । वय्कलं विभागपाखें पिकाःगु 'नेपालभाषा' जर्नल ल्याः ३ नं विमोचन यानादिल । ज्याझ्वलय् प्रशिक्षार्थीतय्सं नं नुगःखँ कनादीगु खःसा 'सत्यहिरा अनुसन्धान सिरपाः' बारे नं जानकारी बिउगु खः ।
