शान्ति प्रक्रिया बारे सत्तारुढ दलतय् मंकाः प्रस्ताव वइगु
संविधानसभाया म्याद हानं दच्छि थप यायेगु प्रस्ताव याःगु सत्तारुढ दलतय्सं शान्ति प्रक्रिया बारे याकनं हे मंकाः प्रस्ताव न्ह्यब्वइगु जूगु दु ।
प्रधानमन्त्री निवास बालुवाटारय् सत्तारुढ दलया प्रमुख नेतात दथुइ मंगलवाः जूगु खँल्हाबंलाय् जेठ १४ न्ह्यः हे मंकाः प्रस्ताव न्ह्यब्वयेगु सहमति जूगु दु । प्रधानमन्त्री झलनाथ खनाल, माओवादी नायः पुष्पकमल दाहाल 'प्रचण्ड' व उपप्रधनमन्त्री नापं जुयादीम्ह मधेशी जनअधिकार फोरमया नायः उपेन्द्र यादव दथुइ सेना समायोजन व शान्ति प्रक्रिया बारे विस्तृत खाका याकनं न्ह्यब्येगु सहमति जूगु खः ।
वय्कपिं दथुइ स्वंगू दलं शान्ति प्रक्रियाया बारे ठोस सहमतिया प्रस्ताव तयार यानाः विशेष समितिया मुँज्याय् न्ह्यब्वयेगु सहमति जूगु खँ प्रधानमन्त्रीया प्रेस सल्लहाकार सूर्य थापां जानकारी बियादिल ।
नेपाली कांग्रेस लगायत विपक्षी दलतय्सं यथास्थितिइ संविधानसभाया म्याद थप यायेमज्यूगु व जेठ १४ गते न्ह्यः हे शान्ति प्रक्रियाया खाका पेश यायेमाःगु अडान कयाच्वंगु इलय् सत्तारुढ दलतय्सं थज्याःगु निर्णय याःगु खः ।
अथेहे संविधान निर्माणया झ्वलय् अझ नं सहमति जुइ ल्यँदनीगु स्वीगू विषयलय् सहमति यायेत संवैधानिक समिति अन्तर्गतया उपसमितियात सक्रिय यायेगु सहमित नं स्वंगू दलया नेतातय्सं या:गु दु ।
