थौं देय्न्यंकं बुद्ध जयन्ती तःजिक हनाच्वन

येँ (सन्ध्या टाइम्स)/थौं २५५५ क्वःगु बुद्ध जयन्ती देय्न्यंकं उल्लासपूर्वक हनाच्वंगु दु। थ्व झ्वलय् थौं विशेष ज्याझ्वः बुद्ध जन्मभूमि लुम्बिनीइ जुयाच्वंगु दु। थौं लुम्बिनीइ जुइगु ज्याझ्वलय् राष्ट्रपति डा. रामवरण यादवं मूपाहां कथं ब्वति कयादीगु ज्यझ्वः दु ।

थौं सुथय् अन छगू शान्ति पदयात्रा नं जूगु खःसा उकी राष्ट्रपति यादवं नं ब्वति कयादीगु खः। थौं जुइगु विशेष ज्याझ्वः धइगु नेपालं लःल्हायेत्यंगु गौतम बुद्ध शान्ति सिरपाः खः। नेपालं पलिस्था याःगु न्हापांगु अन्तर्राष्ट्रिय स्तरया थ्व सिरपाः थौं न्हापांखुसी लःल्हायेत्यंगु खः। थ्व सिरपाः निक्वःगु विश्वयुद्धय् परमाणु बमं ध्वस्त जूगु निगू जापानी शहरय् हिरोशिमा व नागासाकीया तत्कालिन मेयरपिंत लःल्हायेत्यंगु खः ।

मेखे थौं स्वयम्भुया आनन्दकुटी विहारय् नं बुद्धजयन्तीया लसताय् विशेष ज्याझ्वः जुइत्यंगु दु। अथे हे यलय् बुद्धया मूर्ति तयाः देय्चाःहिलेगु व येँय् नं सीघः विहारं बुद्ध मूर्ति तयाः देय्चाःहिलेगु ज्याझ्वः दयेकातःगु दु ।

थौं बुद्ध जयन्तीया लसताय् स्वयम्भु नापं देय्न्यंकंया हे थीथी बौद्धस्थलय् श्रद्धालुतय् तःधंगु भीड जुयाच्वंगु दु। थौं बहनी थीथी थासय् दिपावली नं याइगु ज्याझ्वः दु ।

थौंया दिनय् बलि थौं बुद्ध जयन्ती कुन्हु देशय् हत्याहिंसा निषेध यानातःसां येँया चुनिखेल गाविसस्थित भद्रकाली द्यःयाथाय् धाःसा सलंसः जीवया बलि बीगु चलन दु। थौं नं अन हेँय्, खा व दुगु बलि बियाच्वंगु दु। अन जःखःया तुसाल, तुप्पा व गाम्चाया स्थानीय नेवाः नापं गैर नेवाःतय्सं थ्व बलि बीगु खः। तुसालया स्थानीयवासी न्हुच्छेनारायण श्रेष्ठं बुद्ध जयन्ती हने सिबें सलंसःदँ न्ह्यवंनिसें अन जीब बलि बियाः जात्रा न्यायेकेगु चलन दुगु खँ कनादिल। स्थानीय मनूतय्सं उम्ह द्यःयात पीगं द्यः धकाः नं धायेगु याः ।