माओवादी लडाकू व वाइसीएलपाखें आक्रमण
येँ (सन्ध्या टाइम्स)/इलामया चुलाचुली लागाय् माओवादी लडाकु व वाइसीएलया पुचलं गामय् च्वंपिं मनूतय्त दायेगु नापं न्याम्हेसित नियन्त्रणय् काःगु दु ।
चुलाचुलि लागाया न्हापांगु डिभिजनपाखें विकलया नेतृत्वय् वःपिं लडाकु व स्थानीय वाइसीएलया कार्यकर्तातय्सं वंगु चान्हय् अनया न्हय्खा छेँय् तोडफोड यायेगु नापं मनूतय्त दायेगु तकं यात ।
इमिसं मानबहादुर फागो, मिन्स फागो, चन्द्र नुगो, छविलाल लिम्बू, जितबहादुर लिम्बू, तारा फागो, गवल तुमवापोया छेँय् तोडफोड तकं याःगु खँ थानीय मनूतय्सं संचारकर्मीतय्त धाःगु दु। दायाः घाःपाः जूम्ह जितबहादुर लिम्बूयात उपचारया नितिं विराटनगरया न्यूरो अस्पतालय् यंकूगु दु। वंगु चान्हय् १० बजे निसें ताडफोड यायेगु नापं दायेगु ज्या याःगु खः। नेपाली कांग्रेसया जिल्ला सदस्य तारा फागों धयादिल, 'जिगु छेँय् चान्हय् १२ बजे इपिं वयाः जि च्वंच्वनागु क्वथाय् हे वयाः दयाः मोटरसाइकल नापं छेँ तोडफोड याना वंगु दु ।'
इमिसं तिसा तकं लुटे याना यंकूगु खँ योगमाया तुमावपों धयादीगु दु। लडाकू व वाइसीएल पुचलं मानबहादुर फागो, मिन्सु फागो, चन्द नगो, छविलाल लिम्बू व गवल तम्वापोयात नियन्त्रणय् कयाः थःपिंसं हे ज्वना यंकूगु दु।
वंगु बैशाख २९ गते विना मुखियाया इहिपाया झ्वलय् ल्वापु जूगु विषययात कयाः माओवादी लडाकू व वाइसीएल कार्यकर्तातय्सं अथे तोडफोड यायेगु नापं न्याम्हेसित नियन्त्रणय् काःगु खँ स्थानीय मनूतय्सं धाःगु दु ।
अबलय् ल्वापुया झ्वलय् माओवादी लडाकू न्युशन राई घाःपाः जूगु जानकारी नं स्थानीय मनूतय्सं बिउगु दु ।
