खनाल एमालेया प्रधानमन्त्री मखु : ओली

येँ (सन्ध्या टाइम्स)/ एमालेया बरिष्ठ नेता केपी शर्मा ओलीं थःगु हे पार्टीया अध्यक्ष झलनाथ खनालयात देय्या प्रधानमन्त्री जुइमफुत धकाः द्वपं बियादीगु दु। थौं सुथय् प्रेस चौतारीपाखें नेपालगन्जय् याःगु पत्रकार सम्मेलनय् न्ववासें नेता ओलीं धयादिल, 'खनाल छगू सेक्सनया जक प्रधानमन्त्री खः।' प्रधानमन्त्री जुइ न्ह्यः खनालं याःगु फुक्कं कथंया प्रतिबद्धता पद प्राप्ती जुइवं ल्वःमंकल धासें नेता ओलीं धयादिल, 'खनाल न पार्टीया अध्यक्ष जुइ फत न देय्या प्रधानमन्त्री हे जुइफत।' वय्कलं पतिं धस्वाकाः धयादिल 'प्रधानमन्त्री जुइ न्ह्यः राष्ट्रिय सहमतिया खँ ल्हाइम्ह खनालं पद दयेवं छु राष्ट्रिय सहमित यात?'

एमालेया स्थायी कमिटीया बैठकय् खनालयात प्रधानमन्त्री दयेकेगु नितिं प्रस्तावक जुयादीम्ह नेता ओलीं थ्व इलय् थःत आत्मग्लानी जूगु खँ नं न्ह्यथनादिल। 'बांलाःगु ज्या याइ ला धकाः प्रस्तावक जुयागु खः तर आः खनाल अःखतं न्यासि वंगुलिं आत्मालोचना याये ।'

राष्ट्रिय सहमति मजुइकं संविधान निर्माण याये फइ मखु धासें नेता ओलीं अप्वः ई थौं प्रधानमन्त्री खनालया आलोचना यानाः हे फुकादीगु दु। राष्ट्रिय सहमति मजुइकं संविधानसभाया म्याद थप यायेमजिउ धासें वय्कलं दुई तिहाई बहुमतं संविधानसभाया म्याद थप यात धाःसा संविधानसभा समाप्त जुइ धकाः नं धयादिल ।