मुस्लिम देय् कुवेतय् नं बुद्ध जयन्ती न्यायेकीगु
येँ (सन्ध्या टाइम्स)/२५५५ क्वःगु बुद्ध जयन्ती नेपालय् जक मखु विदेशय् नं तःजिक हनेगु तयारी जुयाच्वंगु दु। थ्व झ्वलय् खाडीया मुस्मां राष्ट्र कुवेतय् नं बुद्ध जयन्ती हनेगु तयारी जुयाच्वंगु खँ सीदुगु दु ।
नेपाल तामाङ्ग घेदुङ कुबेतपाखें २५५५ क्वःगु बुद्ध जयन्ती अन हनेत्यंगु खः। दछि न्ह्यवंनिसें कुबेतय् क्रियाशील जुयाच्वंगु उगु संगठनं थुगुसी न्हापांखुसी बुद्ध जयन्ती भव्य रुपं न्यायेकेत्यंगु खः ।
वइगु २७ तारिख कुन्हु कुबेतया सिटी मालियाया एसिया होटलय् न्ह्याइगु उगु ज्याझ्वलय् ७ गू देय्या राजदूतलिसें बुद्ध धर्मावलम्बीतय्गु नं उपस्थिति दइगु जानकारी ग्वसाः खलकं बिउगु दु। ज्याझ्वलय् मूपाहां कथं नेपाली राजदूत मधुवन पौडेल झाइगु ग्वसाः दुसा श्रीलंका, कम्बोडिया, बर्मा, लावोस व भूटानया राजदूतपिंसं नं पाहां कथं ब्वति काइगु खँ ग्वसाः खलःया अध्यक्ष सुनबहादुर तामांगं बियादिल ।
नेपाल तामाङ्ग घेदुङ कुबेतं बुद्ध जयन्तीया लसताय् न्हापांखुसी नेपाःया संस्कृति, सभ्यता, भेषभुषा ब्वइकथंया साँस्कृतिक कार्यक्रम न्ह्याकेत्यंगु ग्वसाः खलःया दावी खः। उगु ज्याझ्वलय् नेपाःया चर्चित गायक अविनाश घिसिङया नं उपस्थिति दइगुलिसें वय्कलं ज्याझ्वलय् पप, र्याप व सोलो म्येँ हालादी दु। थुकियालिसें ज्याझ्वलय् स्थानीय प्रख्यात कलाकारपिं सञ्जु तामाङ्ग, अशोक लामा, निशा स्याङ्बो, डोल्मा पाखिरन, प्रीति लामापिंसं नं थःथःगु प्रस्तुती न्ह्यब्वइगु जानकारी ग्वसाः खलकं बिउगु दु ।
