'भट्टराईया हत्या योजनां पार्टी दु:खित व सतर्क'
एकीकृत नेकपा (माओवादीं) थःगु पार्टीया न्वकु डा. बाबुराम भट्टराईयात स्यायेगु योजना दयेकाच्वंगु खँ सार्वजनिक याःगु दु । माओवादीं उगु घटनां पार्टी दुःखित व सतर्क जूगु खँ धाःगु दु ।
माओवादी प्रवक्ता दिनानाथ शर्मां थौं छगू विज्ञप्ति पिथना पार्टी ज्याकूथी दुने प्रवेश यानाः नेता भट्टराईया हत्या यायेगु योजना दयेकाच्वंगु खुलासा जुइवं पार्टी दु:खित व सतर्क जूगु खँ न्ह्यथनादीगु दु । घटनाय् संलग्न मनूतय् बारे छानबिन यानाः अनुशासनया दायरा दुने हयेगु पार्टीया दायित्व जूगु खँ नं विज्ञप्तिइ न्ह्यथनातःगु दु ।
विज्ञप्तिइ उगु षड्यन्त्रमूलक घटनाया घोर निन्दा व भर्त्सना यासें लिप्पांगु इलय् अराजक, अनुशासनहीन व उच्छृङ्खल गतिविधिया हुनिं पार्टी दुने प्रतिक्रियावादी घुसपैठ खतरनाक तह तक थ्यनेधुंकूगु गम्भीर आशंका नं याःगु दु ।
नापं नेता भट्टराईयात स्यायेगु योजना दयेकाच्वंगु सीवं उकिया बारे पार्टी नेतृत्वयात जानकारी बिउपिं सुरक्षाकर्मी व जनमुक्ति सेनातय्त सुभाय् नं बिउगु दु ।
सोमवाः माओवादी मजदुर नेता जनक बर्तौलां कोटेश्वरस्थित पार्टी ज्याकूथीइ हे च्वना नेता भट्टराईयात स्यायेगु योजना बारे मोबाइलय् खँल्हानाच्वंगु खः । उगु खँल्हाबंलाय् नापसं च्वंपिं सुरक्षाकर्मी व जनमुक्ति सेनां तायेवं घटना सार्वजनिक जूगु खः ।
