थौं १८क्वःगु मदन-आश्रित स्मृति दिवस
तत्कालीन नेकपा (एमाले)या महासचिव मदनकुमार भण्डारी व संगठन विभाग प्रमुख जिवराज आश्रित छगू रहस्यमय जीप दुर्घटनाय् लानाः मदुगु थौं झिंच्यादँ पूवंगु दु ।
२०५० साल जेठ ३गते पोखराय् जूगु पार्टीया आन्तरिक ज्याझ्वलय् ब्वति कयाः चितवनय् लिहांवयाच्वंगु इलय् दासढुंगाय् जीप दुर्घटनाय् जुयाः निम्ह नेतात मदुगु खः । तर उगु जीपया चालक अमर लामा धाःसा म्वायेत सफल जूगु खः । लिपा जीप चालक लामायात नं येँया किपूली अज्ञात पुचः गोलीं कयेकाः स्याःगु खः । लामा हत्या जुइवं जीप दुर्घटना अझ रहस्यमय जूगु ख: ।
जनताया बहुदलीय जनवाद (जबज)या सिद्धान्त प्रतिपादन यानादीम्ह भण्डारी तत्कालीन इलय् तसकं लोकंव्हाम्ह कम्युनिष्ट नेता जूगुलिं वय्कःयात स्याःगु द्वपं एमालें बीगु यानाच्वंगु दु । तर उगु घटनाया बारे अझ नं बिस्तृत रुपं छानबिन जुइमफुगुलिं उगु घटना नियोजित षड्यन्त्र वा दुर्घटना धइगु बिषय पुष्टि जुइमफुनी ।
