भट्टराईया सुरक्षा माग यासें प्रदर्शन
एकीकृत नेकपा (माओवादी)या न्वकु डा. बाबुराम भट्टराईयात स्यायेगु ख्याच्वःगु वयेवं भट्टराई पक्षधर मजदुत नेता व कार्यकर्तातय्सं वय्कःया सुरक्षा माग यासें पार्टी ज्याकूथीइ प्रदर्शन याःगु दु ।
पार्टी नायः प्रचण्ड पक्षधर मजदुर संगठनया नेता जनक बर्तौलां सोमवाः भट्टराईयात स्यायेगु ख्याच्वः बीवं भट्टराई पक्षधर मजदुर कार्यकर्तातय्सं पार्टीयात उगु विषयलय् ध्यानाकर्षण याकूगु खः । अथेहे भट्टराई पक्षधर मजदुर नेता व कार्यकर्तातय्सं सुरक्षाया माग यासें थौं पार्टी ज्याकू कोटेश्वरय् प्रदर्शन याःगु खः ।
प्रदर्शनकारीतय्सं भट्टराईयात स्यायेगु ख्याच्वः बिउम्ह बर्तौलायात कडा कारवाही यायेत माग याःगु दु । नापं इमिसं पार्टी दुजः कयाः अपराधिक ज्या याइपिंनि पार्टी दुजः खारेज यायेत व अपराधीतय्त संरक्षण मबीत नं पार्टी नेतृत्वयात दबाव बिउगु दु ।
प्रचण्ड पक्षधर मजदुर नेतायात ज्वनेवं वय्कः समर्थित बर्तौलां सोमवा: पार्टी ज्याकूथीइ हे च्वनाः भट्टराईयात स्यायेगु ख्याचवः बियगु खः । प्यम्हु न्ह्यः बाबुराम पक्षधर मजदुर कार्यकर्ता ज्ञानमान डंगोलयात प्रचण्ड पक्षधर मजदुर कार्यकर्तातय्सं आक्रमण यायेवं गृहमन्त्री कृष्णबहादुर महराया निर्देशनय् मजदुर नेता कल्पदिप राईया ज्वंगु खः ।
