दलित आयोगय् हानं नेवाः जाति
येँ (सन्ध्या टाइम्स)/नेवाः जाति दुने दलित दु लाकि मदु धकाः ताः ई तक जूगु सहलह लिपा नेवाः दुने दलित मदु, उकिं दलित आयोगय् नेवाः समुदायया छुं नं जातिया नां दुमथ्याकेगु धकाः सहमति जुइधुंकूसां नं सरकारं उकुन्हु तिनि पेश याःगु दलित आयोगया विधेयकय् हानं नेवाः समुदायया न्हय्गू जातिया नां दलित धलखय् दुथ्याकातःगु दु ।
वंगु वालय् तिनि 'राष्ट्रिय दलित आयोग स्थापना गर्न बनेको विधेयक' धइगु नां तयाः स्थानीय विकास मन्त्रीं सदनय् उगु विधेयक टेबुल याःगु खः। उकी पहाडी समुदायपाखें ५, नेवाः समुदायपाखें ७ व मधेसी समुदायपाखें १७ धकाः मुक्कं २९ गू दलित जातिया नां अनुसूचित यानातःगु दु। उकी नेवाः समुदायपाखें कपाली, कुसुले, पोडे, च्यामे, देउला, खड्गी व कसाही जातया नां दुथ्याकातःगु दु ।
आयोगं थःगु धलखय् हानं नेवाःतय् नां दुथ्याकूगु खँयात कयाः सम्बन्धित जातिया मनूत तम्वयाच्वंगु दु। सरकारं कपालीया नां आयोगया धलखय् दुथ्याके मखुत धकाः कपाली समाजयात लिखित पौ हे बियातःगु दु ।
सम्बन्धित समुदायतय्सं हे थःपिं दलित मखु धायेक धायेकं आयोगं नेवाःतय्त विभाजित यायेगु नियतं हे थथे नां दुथ्याकाच्वंगु आशंका यानाहःगु दु ।
