एमाले-कांग्रेसया कुतः नं अझं जारी

येँ (सन्ध्या टाइम्स) ताः ईया अलमल व खिंचातानी लिपा थौं मधेशी जनअधिकार फोरमं अन्ततः थःगु हे नेतृत्वय् सरकार गठन यायेगु निर्णय यायेवं न्हूगु सरकार गठनया निंतिं कुतः यानाच्वंगु एमाले-कांग्रेस गठनबन्धनयात धक्का लाः वंगु दु । तर फोरमया निर्णय वयेधुंकाः नं थ्व गठबन्धनं सरकार दयेकेगु अन्तिम कुतः धाःसा जारी हे यानाच्वंगु खँ सूत्रं धाःगु दु । उमिसं फुसा फोरम हे कुचा यानाः जूसां मगाःपिं सभासद्त हयेगु धकाः तयारी यानाच्वंगु खःसा उगु कुतः थौं नं जारी दनिगु खँ सूत्रं धाःगु दु । म्हिगः एमालें थौं सनिलय् तक फोरमया निर्णय पीगु यदि अबलय् तक नं फोरमपाखें छुं निर्णय मवल धाःसा सनिलय् तकया दुने फोरमया छुं सभासद्तय्गु हस्ताक्षर कयाः सरकार गठनया दावी याः वनेगु धइगु रणनीति दयेकातःगु खः । तर फोरमं सनिलय् न्ह्यः हे थःगु नेतृत्वय् सरकार दयेकेगु निर्णय यानाः मेपिं नं मधेशवादी दलतय्त थःपिंपाखे वयेत आह्वान याःगु दु । थुिकं यानाः मधेशवादी दलतय्त फोरमयात हे साथ बीत नैतिक दवाव लाःवंगु खँ धाःगु दु ।