सरकार हिलेत तयार: मन्त्री अर्याल
येँ (सन्ध्या टाइम्स)/स्थानीय विसमन्त्री उर्मिला अर्यालं सत्ताया विकल्प मालाच्वंपिं राजनीतिक दलतसें समस्या समाधानया नितिं स्पष्ट खाका हल धाःसा थःपिं सरकार हिलेत थःपिं तयार दु धयादीगु दु ।
थौं सुथय् प्रेस चौतारी नेपालं स्याङ्जाय् ग्वसाः ग्वःगु पत्रकार सम्मेलनय् न्ववायेगु झ्वलय् मन्त्री अर्यालं अथे धयादीगु खः। संविधानसभाया म्याद थप यायेगु नितिं वर्तमान सरकारया राजीनामा कांग्रेसं फ्वनाच्वंगु खँ न्ह्यथँसें वय्कलं धयादिल, 'सत्ता परिवर्तन जक मुलुकया निकास मखु। योजना सहितया खाका ज्वना वा, वर्तमान सरकार पंगः जुइ मखु ।'
वर्तमान सरकार विघटन यात धाःसा झन तःधंगु समस्या ब्वलनी धयादिसें मन्त्री अर्यालं आःया सरकारयात हे राष्ट्रिय सरकार दयेकेमाः धयादिल। स्थानीय विकासमन्त्री अर्यालं आःया अवस्थाय् देय्या समस्या समाधानया मू पंगः धइगु हे प्रमुख प्रतिपक्ष दल नेपाली कांग्रेस खः धकाः द्वपं नं बियादिल ।
मन्त्री अर्यालं धयादिल, 'कांग्रेस हे आःया मू पंगः खः, माओवादीयात न्ह्याथे यानाः नं सहमतिइ हये फइ ।'
संविधानसभाया म्याद दच्छि थप यायेमाःगु आवश्यकता दु धयादिसें वय्कलं संविधानसभाया आः म्याद दछि थपे यायेगु ज्या जुल धाःसा उगु ईया दुने न्ह्याथे यानाः नं वर्तमान सरकारं न्हूगु संविधान हयेगु जुइ धकाः नं धयादिल ।
