थौं प्रचण्ड लिहां वइगु

येँ (सन्ध्या टाइम्स)/म्हिगः आकाझाकां थाइल्याण्ड वंम्ह माओवादी अध्यक्ष प्रचण्ड थौं लिहां वइगु जूगु दु। चिनियाँ संस्था एशिया प्यासेफिक को-अपरेशनया बैठकय् ब्वति कायेत वय्कः म्हिगः आकाझाकां सनिलय् बैंकक झाःगु खः। काय प्रकाश दाहालयात नं ज्वनाः उखे झाःम्ह प्रचण्ड थौं बहनी तकया दुने येँय् थ्यनी धाःगु दु। बैंककय् प्रचण्डं गैर आवासीय नेपाःमितय्गु ज्याझ्वलय् नं ब्वति कयादीगु दु। प्रचण्ड थाइल्याण्ड वनेवं थौं च्वनेगु धयातःगु संवैधानिक समिति अन्तर्गतया उपसमितिया मुँज्या जुइ मफुत। न्हूगु संविधानया नितिं विवाद जुयाच्वंगु विषयय् सहमति यायेगु नितिं प्रचण्डया हे नेतृत्वय् शीर्ष नेतात दुथ्याकाः उगु उपसमिति दयेका तःगु खःसा थुकिया म्याद आः वइगु १३ गते तकया निंतिं म्हिगः जक थपे याःगु खः ।