'संविधान हयेत अझ नं संघर्ष याये मानि'
येँ (सन्ध्या टाइम्स)/नेवाः जागरण मञ्चया ग्वसालय् 'संविधान घोषणा व राज्य पुनर्संरचनाया न्ह्यसः' विषयय् क्षेत्रपाटी पार्टी प्यालेसय् छगू अन्तर्क्रिया ज्याझ्वः न्ह्यात। ज्याझ्वलय् नेवाः स्वायत्त राज्य मंकाः संघर्ष समिति सचिवालयया कजि मल्ल के. सुन्दरं जेष्ठ १४ गते संविधानया मस्यौदा जक पित बीगु जानकारी बिसें संविधान निर्माणया निंतिं फक्व म्हो ई तनेगु ज्या यायेमाःगु खँ कनादिल ।
वय्कलं राज्य पुनर्संरचना, शासकीय स्वरुप व निर्वाचन प्रणालीया विषयय् आःतक सहमति मजूनिगु कारणं यानाः थ्व स्वंगुलिं मू पक्षयात संविधानय् दुथ्याकेमाःगु खँ नं कनादीगु खः। थुकिया लिसें वय्कलं संविधान निर्माणया ज्यायात प्रतिशतय् ल्याःचाः याये मजिउगु जूसां नं यदि प्रतिशतया खँ ल्हायेगु खःसा संविधान निर्माणया ८० प्रतिशत ज्या क्वचायेधुंकूगु खँ कनादिल ।
एकीकृत नेकपा (माओवादी)या सभासद् दिलिप महर्जनं इलय् हे संविधान पितबी मफुगुया मू कारण अझ नं प्रतिक्रियावादी व विदेशी शक्तिया चलखेल हे खः धकाः दावी यानादिल। थुकिया निंतिं आः जनजातितय्सं विगतया तुलनाय् अझ अप्वः संघर्ष यायेमाःगु वर्तमानया आवश्यकता जुयाच्वंगु खँय् नं वय्कलं बः बियादिल। वय्कलं जातीयताया आधारय् हे संघीयता दयेमाः धइगु थःपिनि मूल माग जुइमाःगु खँ नं कनादिल ।
नेपाः राष्ट्रिय पार्टीया सभासद् बुद्ध साय्मिं म्हिगः यानागु आन्दोलनया फल आः पित बीगु संविधानपाखें जनतायात प्राप्त जुइमाःगु खँ तसें संविधान निर्माणया खँयात कयाः नेवाःत अझ गम्भीर जुइमाःगु दु धयादिल ।
नेकपा (एमाले)या केन्द्रीय दुजः राजेन्द्र श्रेष्ठं इलय् हे संविधान पित बी मफुगुया मू कारण धइगु न्हूगु संघीय राज्य व्यवस्थाय् ग्वःगू प्रदेशया निर्माण यायेगु धइगु विषयय् दलतय् दथुइ सहमति मजूगुलिं खः धयादिल। जातीयताया आधारय् प्रदेश निर्माण याये मजिउ धइगु नेपाली काँग्रेसया अवधारणा दुगु खँ नं वय्कलं कनादिल।
ज्याझ्वः नेवाः जागरण मञ्चया कजि सुजीव वज्राचार्यया सभापतित्वय् जूगु खः ।
