बुद्ध जयन्तीया लसताय् रेकी शिविर
येँ (सन्ध्या टाइन्स)/२५५५ क्वःगु बुद्ध जयन्तीया लसताय् रेकी ध्यान केन्द्र सामाखुसिं वंगु शनिवाः स्वास्थ्य शिविर ज्याझ्वः यात। ज्याझ्वःया औपचारिक उलेज्या पुलांम्ह मन्त्री मोदनाथ प्रश्रितं यानादीगु खः ।
ज्याझ्वलय् मूपाहांकथं झाःम्ह प्रश्रितं थौंया २१ औं शताब्दी ब्रम्हाण्डीय शक्तिया प्रयोग भिं मनं तुनाः ध्यानपाखें याये फुगु खँ कनादिल। रेकीं तःतामछि ल्वय्या वासः याउँक हे यायेफु धासें वय्कलं थुगु विधि सयेकेगु निंतिं जात व धर्मया छुं नं पःखाः मदुगु खँ नं कनादिल ।
ज्याझ्वलय् केन्द्रया अध्यक्ष रेकी ग्रायण्ड मास्टर ङग्वाङ्ग रिग्जीन विश्वबन्धुं रेकी बारे प्रवचन बियादीगु खः।
ज्याझ्वलय् ध्यान केन्द्रया सल्लाहकार कमल मल्ली, सुशीलकुमार ढुंगेल, पत्रकार यादव भट्टराईपिंसं रेकी बारे विवेचना यानादीगु खः। अथे हे रामप्रसाद, तारा राई व अष्ट्रेलियन नागरिक पार्टियापिंसं रेकीं थःपिनि स्वास्थ्य स्थितिइ तःधंगु सुधार वःगु खँ कनादीगु खः। ज्याझ्वलय् कोषाध्यक्ष रजनी मल्लीं लसकुस यानादीगु खः। उगु शिविर जेठ १ व २ गते निन्हुयंकं सुथय् व व बहनी यानाः निगू ई सञ्चालन जुइगु खँ ग्वसाः खलकं धाःगु दु ।
