जेलय् बुद्ध पूजा
येँ (सन्ध्या टाइम्स)/बौद्ध शिक्षा तथा सामाजिक सेवापाखें २५५५ क्वःगु बुद्ध जयन्तीया लसताय् येँया भद्रबन्दी जेलय् बुद्धपूजा यात। ज्याझ्वलय् अखिल नेपाल भिक्षु महासंघया दुजः भिक्षु, कारागार, जेलर तीर्थराज भट्टराई, सुरक्षा प्रमुख डि.एस.पि. श्यामप्रसाद पौडेल, विद्वान व मेमेपिं उपासक-उपासिकापिनिगु उपस्थिति दुगु खः ।
भिक्षु सदातिस्स स्थवीरं पञ्चशील प्रार्थना यानाः न्ह्याःगु उगु ज्याझ्वलय् भिक्षु कोलितं मनुष्य जीवनय् बुद्ध धर्मया आवश्यकता बारे धर्मदेशना बियाबिज्यात। नेपाल बौद्ध महासंघया महासचिव थुप्तेन जिग्दोल, कारागारया जेलर तीर्थराज भट्टराई, सुरक्षा प्रमुख डि.एस.पि. श्यामप्रसाद पौडेल, बौद्ध विद्वान प्रा.सुवर्ण शाक्य, कारागारया चौकिदार अजय सेढाईपिंसं नं थःथःगु नुगःखँ तयादीगु खः। ज्याझ्वःया कजि लिसें केन्द्रया महासचिव विजयरत्न तुलाधरं लसकुस यानादीगु खःसा केन्द्रया अध्यक्ष भिक्षु सुमेधं सुभाय् बियादीगु खः ।
ज्याझ्वलय् न्ववाःपिं सकसिनं कारागारय् प्रतिस्थापित बुद्धया मूर्तिं जेलय् च्वंपिं व जेल जीवन क्वचायेकाः लिहां वनीपिंत सभ्य नागरिक जुइत सदां तिबः बियाच्वंगु खँ नं कनादीगु खः ।
लसकुस महासचिव तुलाधरं कारागारय् च्वपिं कैदीतय्त थःपिंसं निःशुल्क मिखा शिविर, प्रशुति शिविर, आत्मनिर्भर जुयाः म्वायेगु निंतिं थीथी तालिम आदि ज्याझ्वः याना वयाच्वंगु दु। बौद्ध शिक्षा तथा सामाजिक विकास केन्द्रं भविष्यय् नं थुज्वःगु ज्या याना वनेगु बचं नं बियादिल ।
