'कांग्रेसयात माओवादीं न्ह्यब्वःगु सेना समायोजन प्रस्ताव अमान्य'
नेपाली कांग्रेसं माओवादीं न्ह्यब्वःगु सेना समायोजनया प्रस्ताव न्हापा जूगु सहमति व सुरक्षा निकायया मापदण्ड अःख जूगु धासें उगु प्रस्ताव कांग्रेसयात अमान्य जूगु खँ धाःगु दु ।
रिपोटर्स क्लबं सोमवाः येँय् याःगु साक्षात्कार ज्याझ्वलय् कांग्रेस महामन्त्री कृष्णप्रसाद सिटौलां माओवादीया समायोजन सम्बन्धी प्रस्ताव विस्तृत शान्ति सम्झौता, अन्तरिम संविधान, अनमिनया रोहबरय् जूगु माओवादी लडाकु व ल्वाभः व्यवस्थापन सम्बन्धी सम्झौता व सुरक्षा निकायया मूल्य व मान्यता अःख जूगु दावी यानादिल ।
वय्कलं माओवादीया प्रस्ताव न्हापा जूगु फुक्कं सम्झौता प्रतिकुल जूगुलिं उकियात कांग्रेसं छुं नं हालतं स्वीकार मयाइगु धयादिल । वय्कलं लडाकुतय् बिस्कं फोर्स दयेकीगु वा बिस्कं मिश्रित फोर्स दयेकेगु माओवादी प्रस्ताव सेना समायोजन विशेष समितिं पारित मजुइगु दावी नं यानादिल ।
थःपिं न्हापा जूगु सम्झौता पालनाय् अडिग जूगु धयादिसें नेता सिटौलां लडाकु समायोजन सुरक्षा निकायया मापदण्ड कथं हे समायोजन जुइमाःगु धयादिल ।
