प्रश्नपत्र आउट याःपिं प्रहरी नियन्त्रणय्
छुं ई न्ह्यः उच्च माध्यमिक शिक्षा परिषदं सञ्चालन याःगु कक्षा १२या जाँचया प्रश्नपत्र आउट याःपिंत प्रहरीं ज्वंगु दु ।
प्रहरी अनुसन्धान ब्यूरोया विशेष पुचलं आइतवाः प्रश्नपत्र आउट याःगु पुचःया मू योजनाकार रुद्र अधिकारी सहित प्यम्हेसित ज्वंगु खः । ज्वम्हं अधिकारी कालिमाटी स्थित जिलेट कलेजया कोआर्डिनेटर खःसा नरेन्द्र सुवेदी ब्राइटल्याण्ड कलेजया शिक्षक, विनोद बस्नेत व सन्तोष कुँइकेल न्युटन कलेजया विद्यार्थीत खः । प्रहरीं इमित कलंकी व रविभवनं नियन्त्रणय् काःगु खः ।
वंगु वैशाष १९ निसें ३०गते तक न्ह्याः जाँचय् फिजिक्स, कम्प्युटर साइन्स, होटल म्यानेजमेन्ट व विज्नेस म्याथस् लगायत विषयया प्रश्नपत्र आउट जूगु खः । अभियुक्ततय्सं उगु प्रश्नपत्र खुद्वं निसें नीन्याद्वं तका कया मिउगु खः ।
अभियुक्ततय्त शिक्षा ऐन २०२८ अन्तर्गत अपराध अनुसन्धान कथं कारवाही न्ह्याकीगु जूगु दु । इमिगु अपराध पुष्टि जूसाः अभियुक्ततय्त छगू लख जरिवाना वा खुला कैद सजाय वा निगूलिं जुइफइगु व्यवस्था दु ।
