प्रधानमन्त्रीपाखें चीधंगु दलया नेतात नाप सहलह
माओवादि अध्यक्ष व काम चलाउ प्रधानमन्त्री पुष्पकमल दाहाल प्रचण्डं नागरिक सर्वोच्चता कायम यायेत व राष्ट्रियताया पक्षय् ग्वहालि यायेत चीधंगू दलत नाप इनाप यानादीगु दु ।
प्रधानमन्त्री निवास बालुवाटारय् शनिवाः राप्रपा नेपाल, नेपाल जनता दल व नेकपा संयुक्तया नेतात नाप अलग्ग-अलग्ग हे नापलना थ्व इनाप यानादीगु खः । प्रधानसेनापति प्रकरणय् राष्ट्रपतिं ल्ह्वंगु पलाःखं नागरिक सर्वोच्चता खतराय् लाःगु व लिप्पांगु ईलय् विदेशी चलखेल हावी जुयावंगुलिं राष्ट्रियता पक्षधरत छप्पँ जुइमाःगुलि बः बियादीगु ख: ।
थीथी दलया नेतात नापलाय्गु झ्वलय् न्हूगु सत्ता समिकरणया बारे नं सहलह जूगु खः । प्रधानमन्त्री प्रचण्डं एमाले गठबन्धनयात समर्थन मयायेत राप्रपा नेपालया अध्यक्ष कमल थापा नाप इनाप यनादीगु खः । वयेकलं माओवादी नेतृत्वय् सरकार गठन यायेमफुसाः विकल्पया कथं मधेशी जनअधिकार फोरमया नेतृत्वय् सरकार गठन यायेत ग्वहालि यायेत इनाप यानादीगु खः । लिसःलय् राप्रपा नेपालया अध्यक्ष थापां प्रधानमन्त्रीया प्रस्ताव सकारात्मक जूगु धासें थुकीयात पार्टी केन्द्रीय समितिया बैठकं निर्णय याइगु धयादिल ।
थ्वस्वयां न्ह्यः शुक्रवाः सुथय् कांग्रेस सभापति गिरिजाप्रसाद कोइरालां एमाले नेतृत्वया सरकार गठन यायेत ग्वहालि यायेत थापायात इनाप यानादीगु खः । सरकार निर्माणया निंतिं मधेशी जनअधिकार फोरमं स्पष्ट निर्णय यायेमफेवं चीधंगु दलतय् महत्व अप्वयावंगु दु ।
