बिष्णु सक्वया अन्तिम एल्बम
मत्यवं मदुम्ह कलाकार बिष्णु सक्वं लय् चिनातःगु म्येँया एल्बम पिहां वइगु जूगु दु। म्येँ च्वमि राजभाई जकःमिं च्वयातःगु म्येँय् भाजु सक्वं लय् चिनादीगु खः। तर वय्कः दनिबलय् उगु म्येँ न्यने मखन। आः उगु फुक्कं म्ये गायिका रीता महर्जनं हालाः पिकायेत्यंगु खः ।
'मृत्युशैय्याय् ह्वःगु स्वां' नां तयाः पिहां वयेत्यंगु उगु एल्बम थौं न्हिनसिनया ४.२५ बजे नेपाल टेलिभिजनया 'नेवाः सः' ज्याझ्वलय् जनकवि दुर्गालाल श्रेष्ठं विमोचन यानादीगु ज्याझ्वः दु। ज्यापु महागुथिं पिथंगु उगु एल्बमय् बुद्ध धर्म सम्बन्धी च्यापु म्येँ दुथ्याः ।
मदुम्ह बिष्णु सक्वया नामं छगू संगीत कोष नीस्वनेगु निर्णय नं जूगु दु। थुगु एल्बम मियाः वःगु ध्यबा उगु हे कोषय् तयेगु खँ नं धाःगु दु। मदुम्ह कलाकार बिष्णु सक्वया थ्वहे अन्तिम एल्बम खः ।
