सभासद पासवानं लं खुनाः क्यना बिल
येँ (सन्ध्या टाइम्स)/थौं च्वंगु सवैधानिक समितिया बैठकय् कचमच जुइवं समितिया सभापति निलाम्बर आचार्यं मार्शल लगे यायत आदेश बियादीगु दु। बैठकय् सभापति आचार्यं निर्णय न्यंकेत्यंबलय् थःपिनि सहमति मदयेक निर्णय च्वल धकाः दलित जनजाति पार्टीया सभासद विश्वेन्द्र पासवानं निर्णय सफू हे लाकाः खुइत्यंगुलिं सभापतिं मार्सल लगे यायेत आदेश बिउगु खः ।
मर्यादा पालकत न्ह्यःने वयेवं पासवानं थः शान्तिवादी खः धासें थम्हं फिनातःगु टिसर्ट खुनाः छाति क्यना बिल। अनं लिपा राज्यपाखें बहिष्करणय् लाकातःपिं समुदायया सभासद्तय्सं समितिया सभापति आचार्ययात ज्याकू घेराउ याः वंबलय् आचार्य धाःसा ज्याकू त्वःताः वनेधुंकूगु खँ नेपाः राष्ट्रिय पार्टीया सभासद् बुद्ध साय्मिं कनादिल।
उखे आचार्यं संवैधानिक समितिया उपसमितिया म्याद जेठ १३ गते तक थपे यायेगु निर्णय जुल धयादीसां आन्दोलन याना वयाच्वंगु दलया सभासद्तय्सं धाःसा उगु निर्णय जूगु हे मदुनि धकाः दावी यानादीगु दु। थौंया बैठक न्ह्यायेवं हे थःपिनि मागया बारे सभासद् साय्मिं खँ तयादीगु खःसा अनं लिपा माओवादी अध्यक्ष प्रचण्ड, प्रधानमन्त्री झलनाथ खनाल व कांग्रेस नेता रामचन्द्र पौडेलं खँ तयादीगु खः। बैठकं स्वंगू चिचीधंगु दल व छम्ह स्वतन्त्र सभासद्या मागयात संवोधन यायेत सर्वदलीय बैठक सःतेगु निर्णय नं याःगु दु ।
