झलनाथ-प्रचण्ड नं जवाःसवाः
येँ (सन्ध्या टाइम्स)/माओवादी प्रचण्डया हे समर्थन दयाः प्रधानमन्त्री झलनाथ खनालया थ्व सरकार बने जुइ फुगु खः। तर गबलें गबलें धाःसा अध्यक्ष प्रचण्ड व प्रम खनाल दथुइ नं ठाकठुक जुइयःगु जुयाच्वन। उकुन्हु विहीवाः जूगु २७ दलया बैठकय् नं अथे हे जुल ।
प्रम इस्तानबुलं लिहां वयेसातकि हे च्वंगु उगु बैठकय् न्ववासें प्रम खनालं 'जिमिसं माओवादीयात पिने नं तया स्वया, आः दुने तयाः स्वयाच्वनागु दु' धयादिल। अन्तिमय् बैठक हे सिधयेधुंकाः प्रचण्डं जिगु नं छकूचा धायेगु दु धासें कनादिल, 'न्हापा गिरिजाप्रसादजुं थःगु राजनीति हे दाउलय् पानाः माओवादीयात मूलधारय् हयागु दु। बूसा गिरिजा बुइ, त्याःसा देश हे त्याइ धकाः धयादिल। जिपिं वास्तवय् गिरिजाबाबुया निगाहं १२ बुँदे सम्झौता यानाः खुल्ला जुयापिं मखु। तर वय्कलं थम्हं हे जस काये थें अथे धयादिल। आः नं थन दुने व पिनेया खँ वयाच्वन, थ्व खँ न्यनाबलय् धाःसा जितः वहे गिरिजाप्रसादजुं धयादीगु पुलांगु खँ हे लुमंति वयाच्वन ।'
प्रचण्डं अथे धयादीबलय् बैठकय् उपस्थित मेपिं ह्वारर्र न्हिउसां प्रम खनालया ख्वाः धाःसा खिउँसे च्वनावंगु खः ।
