पासपोर्ट काण्डय् साहित्यकार

येँ (सन्ध्या टाइम्स)/सभासद्द्वय गायत्री साह व बीपी यादवपिंसं कुटनीतिक पासपोर्ट मिउगु काण्डय् छम्ह नांजाःम्ह साहित्यकारया समेत नां पिहां वयेवं वय्कः साहित्यकार भाजु बिसिउँ बिसिउँ जुयाच्वंगु खँ 'अनलाइन खबर डट कमं' जने याःगु दु ।

थ्व पासपोर्टय् लाःम्ह साहित्यकार खः प्रतिक ढकाल। छुं ई न्ह्यः जक थ्व साहित्यकारं च्वयातःगु नियात्रा सम्बन्धी सफू बजारय् दकलय् अप्वः बिक्री जुयाच्वन धकाः पत्रिकाय् ग्वाःग्वाः भिंतुना विज्ञापन प्रकाशन जुयाच्वंगु खः। साझा प्रकाशन, प्रज्ञा प्रतिष्ठानं याइगु सफू ब्वज्याय् नापं वयागु हे सफू दकलय् अप्वः चुल धकाः नं विज्ञापन वयाच्वंगु खः ।

आपालं नियात्रा सफू च्वयेधुंकूम्ह उम्ह साहित्यकार त्रिभुवन अन्तर्राष्ट्रिय विमानस्थल अध्यागमन कार्यालयया प्रमुख खः। वयागु साहित्यिक नां प्रतिक ढकाल खःसां आधिकारिक नां धाःसा षडानन्द ढकाल जुयाच्वन। आः नकतिनि हे अख्तियारं उगु ह्याउँगु पासपोर्ट प्रकरणय् नां दुपिं मनूतय् विरुद्ध दर्ता याःगु मुद्दाय् षडानन्द ढकालयात नं निदँ कैद व न्यय्द्वः तका बं पुइकेगु माग यानातःगु दु। अख्तियारं थःगु नामय् नं मुद्दा दायर यायेसातकि साहित्यकार ढकाल बिसिउँ वनाच्वंगु खँ धाःगु दु ।

२०१६ साल जेठ १३ गते भूटानया दागापेला धाःगु थासय् जन्म जूम्ह ढकाल प्यदँया उमेरय् भूटानं नेपाः वःगु खः। तर वयागु पुलांगु छेँ धाःसा झापाय् खः ।

छुं ई न्ह्यः तक वं च्वयातःगु आपालं सफूत राजधानीइ जुइगु थीथी सफू मेलाय् 'बेस्ट सेल' जुयाच्वंगु खःसां छुं मनूतय्सं धाःसा वं थःगु सफू फुक्क थम्हं हे न्यानाः बेस्ट सेलय् लाकेगु यानाच्वंगु द्वपं नं बियाहःगु दु ।