फोरम सभासदत दथुइ ल्हाः वालाः ल्वापू
सरकारय् ब्वति कायेगु वा मकायेगु धइगु खँय् निर्णय याये ल्यं दनीगु मधेशी जनअधिकार फोरमया सभासदत दथुइ ल्हाः वालाः ल्वापू जूगु दु ।
शुक्रवाः सिंहदरवारय् च्वंगु पार्टी संसदीय दलया ज्याकूथी च्वंगु संसदीय दलया बैठकय् सभासद मृगेन्द्र सिंह यादव न्ववायेगु झ्वलय् छुं सभासदतय्सं लापाः थाःगु व पार्टी अध्यक्ष उपेन्द्र यादव न्ववायेगु झ्वलय् लापाः मथाःगु धका विवाद जूगु खः । विवाद अप्वयेवं लिपाः निगू पुचः दथुइ ल्हा वालाः ल्वापू जूगु खः ।
उगु घटना लिपाः फोरम संसदीय दलया नेता विजयकुमार गच्छेदारं पत्रकार सम्मेलन यनाः केन्द्रीय समितिं सभासदतय्सं ल्ह्वंगु खँयात बेवास्ता याना सामन्ति प्रवृति क्यंगु द्वपं बियादिल । पत्रकार सम्मेलनय फोरम अध्यक्ष उपेन्द्र यादवं धासाः छुं न्ववानामदी ।
संसदीय दलया बैठकय् ल्वापू जू थाय् फोरमया सभासदतय्सं पत्रकारतय् नं दुव्र्यवहार याःगु दु । सभासदतय्सं अन वंपिं इमेज च्यानल, च्यानल नेपाल, नेपाल टेलिभिजन व कान्तिपुर टेलिभिजनया क्यामेराम्यानतय्त आक्रमण याःगु खः ।
