आदिवासी जनजाति संयुक्त संघर्ष समिति नीस्वन

न्हूगु संविधानय् आदिवासी जनजातितय् हक अधिकार सुनिश्चिताया निंतिं कडा आन्दोलन यायेत आदिवासी जनजाति संयुक्त संघर्ष समिति नीस्वंगु दु । ता: ई न्ह्य: निसें नेवाः स्वायत्त राज्य मंका संघर्ष समिति व ताम्सालीङ स्वायत्त राज्य संयुक्त संघर्ष समितिं थीथी आदिवासी जनजाति संघ संस्थातनाप मंका: मोर्चा दयेकेत यानाच्वंगु सहलह लिपा थौं थुगु संघर्ष समिति नीस्वंगु ख: ।

आदिवासी जनजाति संयुक्त तदर्थ समितिया ग्वासालय् थौं यलया अक्षेश्वर महाविहारय् च्वंगु मुँज्यां उगु समिति नीस्वंगु खः । उगु समितिइ न्याम्ह दुजः दुगु संयोजन मण्डल व झिंन्हय्म्ह दुजः दुगु सचिवाल नं गठन याःगु दु ।

संयोजन मण्डलय् नेपाल आदिवासी जनजाति महासंघया नायः राजकुमार लेखी, आदिवासी जनजाति राष्ट्रिय महिला महांसघया नकिं सोनी लामा, सभासद् सुरेश आले मगर, नेवाः स्वायत्त राज्य मंका संघर्ष समितिया सचिवालय कजि मल्ल के. सुन्दर व ताम्सालीङ स्वायत्त राज्य संयुक्त संघर्ष समितिया परशुराम तामाङ च्वनादीगु दु ।

उगु समितिइ थीथी राजनीतिक दल आवद्ध आदिवासी जनजातितय् भातृ संगठन, संविधानसभा दुने दुगु आदिवासी जनजाति सभासद्तय् दवाव पुच: ककस, थीथी जनजाति संस्था आवद्ध मिसा, विद्यार्थी लगायत पत्रकारतय् संगठन दुजः कथं च्वंगु दु ।

समितिं न्हूगु संविधानय् गणतन्त्र, संघीयता, धर्मनिरपेक्षता, पहिचान व सामर्थ्यया आधारय् राज्य पुनर्संरचना, अग्राधिकार व आत्मनिर्णयया अधिकार दुगु स्वाशासन सहितया स्वायत्त राज्य दयेमाःगु माग यानाः व्यापक रुपं आन्दोलन यायेगु निर्णय नं याःगु दु ।

न्हापांगु चरणया आन्दोलन कथं जेठ ९ गते थीथी राजनीतिक दल आवद्ध आदिवासी जनजाति भातृसंगठनं थःथःगु माउ पार्टीया ज्याकूथीइ धर्ना बीगु, जेठ ११ गते थीथी थासं आदिवासी जनजातितय् त:धंगु जुलुस पिथना: संविधानसभा घेराउ यायेगु व १२ गते निसें १४ गते तक संविधानसभाय् धर्ना बीगु ज्याझ्वः क्वःछिउगु दु ।

जेठ १४ गते तकया न्हापांगु चरणया आन्दोलन लिपा समितिं मेगू चरणया आन्दोलन बारे निर्णय याइगु ज्याझ्वः दु । थौंया मुँज्या आदिवासी जनजाति सभासद्तय् दवाव पुच: ककसया पुलाम्ह नाय: आइबी गुरुङया सभापतित्वय् च्वंगु ख: । कन्हय् छगू पत्रकार सम्मेलन याना: थौं नीस्वंगु संघर्ष समितिया बारे जानकारी बीगु ज्याझ्व: दु ।