प्यम्ह सभासद्तय् माग सम्बोधन यायेत सर्वदलयी मुँज्या
संविधानसभाया मुँज्या व संवैधानिक समितिया मुँज्याय् थीथी माग यानाः आन्दोलन यनाच्वंपिं चिधंगु दलया प्यम्ह सभासद्तय् माग सम्बोधन यायेत सर्वदलीय मुँज्याया आव्हान याइगु जूगु दु ।
संवैधानिक समितिया थौं च्वंगु मुँज्यां प्यम्ह सभासद्तय् माग सम्बोधन यायेत सर्वदलीय मुँज्या आव्हान यायेगु व कार्यदल नीस्वनाः वार्ता यायेगु निर्णय याःगु खः । थ्वस्वयां न्ह्यः सिमान्तकृत समुदाय, आदिवासी जनजाति, दलित, मुस्लिम लगायत समुदायया आधिकार न्हूगु संविधानय् सुनिश्चित जुइमाःगु माग यासें प्यम्ह सभासद्तय्सं संसद व समितिया मुँज्याय् अवरोध यानावयाच्वंगु खः ।
थौंया मुँज्या सुरु जुइवं नेपाः राष्ट्रिय पार्टीया सभासद् बुद्ध साय्मिं थःपिनिगु माग सम्बोधन जूगु खः वा मखु धइगु बारे जानकारी बीत इनाप यानादीगु खः । वय्कःया न्ह्यसःया लिसः बियादिसें प्रधानमन्त्री झलनाथ खनालं सभासद्तय्सं तःगु माग संविधानसभापाखें हे पूवंकेमाःगुलिं मुँज्या अवरोध मयायेत सभासद्तय्त इनाप यनादिल ।
अथेहे माओवादी नायः पुष्पकमल दाहाल 'प्रचण्डं' प्यम्ह सभासद्तय् माग सकारात्मक जूगु धयादिसें संवैधानिक समितिपाखें हे थुगु माग बारे सहलह यानाः निर्णय यायेमाःगु धयादिल । कांग्रेस संसदीय दलया नेता रामचन्द्र पौडेलं प्रक्रियागत रुपं मागत सम्बोधन यानाः यंकेमाःगु धयादिल ।
वय्कःपिंसं न्ववयेधुंकाः संघीय लोकतान्त्रिक राष्ट्रिय मञ्चया सभासद् रुक्मणी चौधरीं थःपिनिगु माग प्रति राजनीतिक दलत गम्भीर मजूगु द्वपं बियादिसें आक्रोशित जुयादिल ।
वयां लिपा संवैधानिक समितिया सभापति निलाम्बर आचार्यं मुँज्याया निर्णय न्यंकेत्यंगु इलय् दलित जनजाति पार्टीया सभासद् विश्वेन्द्र पासवानं निर्णय पुस्तिका लाका कायेगु कुतः यात । उगु कुतः यायेवं सभापति आचार्यं मार्सल लगे यायेत उजं बिउगु खः । मर्यादा पालकतय्सं पासवानयात पनेत स्वयेवं वय्कलं थःम्हं हे पुनातःगु वसः खुइगु ज्या याःगु खः ।
