संविधान घोषणा व राज्य पुनर्संरचनाया बारे अन्तक्रिया
'संविधान घोषणाया सवाल व राज्य पुनर्संरचनाया सवाल'यात कयाः नेवाः जागरण मञ्चं म्हिगः थनया क्षेत्रपाटी पार्टी प्यालेसय् छगू अन्तक्रिया ज्याझ्वः यात ।
उगु ज्याझ्वलय् नेकपा (एमाले)या केन्द्रीय दुजः राजेन्द्र श्रेष्ठं न्हूगु संविधान इलय् हे घोषणा यायेमफुगु हुनिं न्हूगु संघीय राज्य व्यवस्थाय् ग्वःगु प्रदेशया निर्माण यायेगु धइगु खँय् दलतय्गु दथुइ छगू हे विचाः मवःगु व जातीयताया आधारय् प्रदेश निर्माण यायेमज्यू धइगु बिंचाः नेपाली कांग्रेस तयाच्वंगुलिं नं इलय् घोषणा यायेमफुगु बिचाः तयादीगु खः ।
अथेहे उगु अन्तक्रिया ज्याझ्वलय् एकीकृत (माओवादी)या सभासद् दिलीप महर्जनं संविधान इलय् घोषणा यायेमफुगु हुनिं अझ नं प्रतिक्रियावादी शक्ति व विदेशी शक्तिया चलखेल दुगुलिं जूगु बिचाः प्वंकादिसें अझ नं संघर्षया आवश्यकता दुगु धयादिल ।
नेपाः राष्ट्रिय पार्टीया सभासद् बुद्ध साय्मिं संसदय् उत्पीडनय् लानाच्वंपिं जनता अले समग्ररुपं नेवाः अधिकारयात स्थापित यायेगु निंतिं थःपिसं संघर्ष यानाच्वनागु खँ तयादिसें राज्य पुनर्संरचनाया सवालय् अझ नं नेवाः गम्भीर जुयाः न्ह्याः वनेमालीगु बिचाः तयादिल ।
नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं संविधान निर्माण उत्पीडनय् लाःपिं जनता, अले फुक्क आदिवासीतय्गु अधिकारयात सुनिश्चित याये हे मा:गु हे धयादिसें ०६३ सालया जनआन्दोलनय् नेतातय्सं गुगुकथं जनतायात बचं बिल व जनता सतकय् कुहाँ वयाः आन्दोलन सफल यात आः व बचं नेतातय्सं पूवंकेमाः धकाः धयादिल ।
नेवाः जागरण मञ्चया संयोजक सुजीव बज्राचार्यया सभापतित्वय् जूगु उगु ज्याझ्वलय् नेतातयसं न्ववायेधुंकाः अन्तक्रिया ज्याझ्वः जूगु खः ।
