एमाले नेतृत्वया सरकारय् ब्वति कायेत प्रचण्डयात कोइरालाया इनाप
नेपाली कांग्रेसया सभापति गिरिजाप्रसाद कोइरालां एमाले नेतृत्वय् गठन जुइगु सरकारय् ब्वति कायेत माओवादी अध्यक्ष व काम चलाउ सरकारया प्रधानमन्त्री पुष्पकमल दाहाल प्रचण्डयात इनाप यानादीगु दु ।
कोइरालाया छेँ महाराजगंजय् शुक्रवाः जूगु खँल्हाबंलाय् कांग्रेस सभापति कोइरालां शान्ति प्रक्रियायात निष्कर्षय् थ्यंकेत व न्हूगु संविधान निर्माणया निंतिं नं राष्ट्रिय सहमतिया सरकार आवश्यक जूगु धासें आः गठन जुइगु सकराय् ब्वति कायेत इनाप यानादिल ।
राष्ट्रिय सहमतिया सरकार गठन याना सरकार संचालनया निंतिं उच्च स्तरीय राजनीतिक संयन्त्र गठन याना दक्व दलया शीर्ष नेतात दुथ्याकेगु प्रस्ताव कोइरालां तयादीगु खः । वयेकलं प्रधानमन्त्री प्रचण्ड समक्षय् थः स्वयम नं उगु संयन्त्रय् च्वनेगु व प्रचण्डयात नं च्वनेत इनाप यानादीगु जानकारी पुलांम्ह गृहमन्त्री कृष्णप्रसाद सिटौला बियादलि ।
अथेहे खँल्हाबंलाय् प्रधानमन्त्री प्रचण्डं झिनिगू बुँदे सहमति गुकथं दलत छप्पँ जुयाः याःगु खः अथेहे याना आः नं राष्ट्रिय सहमतिया आवश्यकता दुगु खँ धयादिल । खँल्हाबंलाय् अर्थमन्त्री व माओवादीया वरिष्ठ नेता डा. बाबुराम भट्टराईं संविधान निर्माण प्रकृया व शान्ति प्रकृयायात तार्किक निष्कर्षय् थ्यंकेत राष्ट्रिय सहमतिया सरकार गठन यायेत माओवादी तयार जूगु धयादिल ।
नेता भट्टराईं छुं नं दल व व्यक्ति विशेषयात न्ह्यने सारे याना राष्ट्रिय सहमति कायम याये मफइगु खँ कोइराला समक्ष तयाःगु ख:। वयकलं राष्ट्रपति व प्रधानसेनापतिया खँय् न्हूगु सहमति मजूतल्ले सरकार गठनया खँय् सहमति जुइ मफइगु धयादिल । निताः खँ बारे सहमति जुसाः सहमति याना न्ह्याःगु दलया नेतृत्वय् सरकार गठन यासां मान्य जुइगु खँ नेता भट्टराई धयादिल ।
