थीथी अवधारणा पतिइ सहलह

संविधान सभा अन्तर्गतया संवैधानिक समितिया शुक्रवाः च्वंगु बैठकय् राजनीतिक दल व थीथी उपसमितिं न्ह्यब्वःगु अवधारणा पौ सम्बन्धी प्रतिवेदनय् सहलह याःगु दु । बैठकय् सहलहया झ्वलय् वःगु सुझावयात मुंकाः मस्यौदा तयार याइगु जूगु दु ।

समितिया सभापति माधवकुमार नेपालया अध्यक्षताय् च्वंगु बैठकं थ्वहे वइगु जेठ ४ गते मेगू बैठक च्वनाः उपसमितिं संविधानया न्हापांगु ब्वलय् दइगु विषय व संविधानया नां सम्बन्धय् तयार याःगु अवधारणा सम्बन्धी प्रतिवेदनय् सहलह यायेगु ज्याझ्व क्वछीगु दु ।

समितिं आः तक संकटकाल व संविधान संशोधन सम्बन्धी उपसमितिया प्रतिवेदनय् सहलह याना अवधारणा देयेके धुंकूगु दु । मस्यौदा बारे आवश्यक जुसाः सहलह याना थप स्पष्ट यायेगु निर्णय बैठकं याःगु दु ।