थनिंनिसें राष्ट्रिय जनगणना शुरु
राष्ट्रिय जनगणना - २०६८ थनिंनिसें न्ह्याःगु दु । जेठ १ गतेनिसें १८ गतेतक्क न्हापांगु चरणय् व असार ३ गतेनिसें १३ गतेतक्क निक्वःगु चरणय् जनगणना सञ्चालन याइ ।
केन्द्रीय तथ्यांङ्क विभागयाकथं जनगणनाया नितिं साढे आठ हजार सुपरिवेक्षक व गणकत छ्वःगु खः । गणकतय्सं देय्न्यंकया ३ हजार ९ सय गाविस व ५८ नगरपालिकाया प्रत्येक छेँजःया दुजःतय्त नापलानाः तथ्यांङ्क संकलन याइ । स्वंगूगु लिङ्गीया नापं तथ्यांङ्क संकलन याइगु केन्द्रीय तथ्यांक बिभागया निर्देशक रुद्र सुवालं जानकारी बियादिल ।
छेँया हामा, परिवार ल्याः, मिसा व मिजंया ल्याः, पेशा व्यवसाय, आय आर्जन लगायत न्यय्गू बुँदाय् तयार याःगु प्रश्नावलीया आधारय् तथ्यांङ्क संकलन याइगु जूगु दु । जनगणनाया नितिं थुगु दँ 'सु नं त्वःमफिमाः, सु नं दोहरय् मजुइमाः, अप्वः यानाः याःगु थासं हे थःगु विबरण च्वके' धइगु मू नारा तयातःगु दु ।
नेपालय् न्हापांगु खुसिइ १९६८ सालय् जनगणना न्ह्याःगु खः । अनंलिपा हरेक झिदँय् जनगणना जुयाः वयाच्वंगु खः । थ्व सच्छि दँया झिंछक्वःगु राष्ट्रिय जनगणना खः ।
