'एमालें म्याद थप बारे सर्वसम्मतं निर्णय याइ'
संविधानसभाया म्याद थप यायेगु विषयलय् सत्ता नेतृत्व यानाच्वंगु नेकपा (एमाले) दुने विवाद ब्वलनाच्वंगु इलय् उगु पार्टीया छ्याञ्जे युवराज ज्ञवालीं एमालें सर्वसम्मतं म्याद थपया पक्षय् निर्णय याइगु दावी यानादीगु दु ।
वय्कलं वइगु जेठ ९ व १०गते च्वनीगु एमाले केन्द्रीय कमिटीया मुँज्यां सर्वसम्मतं निर्णय याइगु दावी यानादिल । संविधानसभाया म्याद दच्छिया निंतिं थप यायेत सरकारं संसदीय सचिवालय् प्रस्ताव दर्ता यायेवं एमाले दुने विवाद ब्वलंगु खः ।
रिपोटर्स क्लबं शनिवाः येँय् याःगु साक्षात्कार ज्याझ्वलय् नेता ज्ञवालीं वइगु जेठ १४गते न्ह्य: हे सरकारं सेना समायोजनया ठोस प्रस्ताव व संविधान निर्माण जुइगु सुनिश्चितता बीगु दावी यानादिल ।
उगु ज्याझ्वलय् नेता ज्ञवाली नापं माओवादीया केन्द्रीय दुजः देव गुरुङं संविधानसभाया म्याद थप यायेत सरकार विघटन यायेमाःगु कांग्रेसया माग अस्वीकार यानादिल । निम्ह नेतातय्सं सरकार व संविधानसभाया म्याद निगू बिस्कं बिस्कं विषय जूगुलिं निगू विषययात मस्वायेत इनाप यानादिल ।
नेता गुरुङं वर्तमान सरकारया विकल्प मदुगु धयादिसें यदि सर्वसम्मतं म्याद थप यायेमफुसाः दुई तिहाई बुहमतं नं म्याद थप यायेफइगु धयादिल ।
ज्याझ्वलय् कांग्रेस नेता डा. प्रकाशशरण महत व राष्ट्रिय जनशक्ति पार्टीया सह अध्यक्ष प्रकाशचन्द्र लोहनीं यथास्थितिइ संविधानसभाया म्याद थप यायेगु उचित मजूगु बिचाः प्वंकादीगु खः ।
