संविधान निर्माणया निंतिं ल्याम्हतय् प्रदर्शन
वइगु जेठ १४ गते नं संविधान निर्माण मवइगु प्राय निश्चित जुइधुंकल । सरकारं संविधानसभाया म्याद हानं दच्छिया निंतिं थप यायेत संसदीय सचिवालय् प्रस्ताव दर्ता यायेधुंकूगु दु । हानं दच्छि म्याद थप यायेगु वा मयायेगु बारे सत्तारुढ व प्रतिपक्षी राजनीतिक दलत दथुइ 'बाग्रेनिङ' जुयाच्वंगु ।
थुगु हे इलय् धाःसा येँया सतकय् आपालं ल्याम्हत कुहांवयाः संविधान निर्माणया निंतिं दबाव बिउगु दु । छुं नं दल विशेष वा संस्थानाप आवद्ध मजुसें फेसबुक मार्फत आव्हान याःगु उगु ज्याझ्वः अन्तर्गत थौं ल्याम्हत सतकय् कुहांवःगु खः ।
'ज्याल पूवंक काल, आः संविधान बिऊ!, आः न्वमवासाः गुबलय्, झीसं न्वमवासाः सुनां?' धइगु नारा बियाः आपालं ल्याम्हतय्सं थौं संविधानसभा भवन न्ह्यने प्रदर्शन याःगु खः ।
छुं दिं न्ह्यः जक थज्याःगु हे फेसबुक मार्फत न्ह्याकूगु क्याम्पेनं मइतिघर मण्डलाय् संविधान निर्माण यायेत दबाव स्वरुप घर्ना बिउगु खः ।
