सरकार विघटन जूसाः म्याद थप : कांग्रेस
शान्ति व संविधान बारे ठोस कार्ययोजना मदयेकं संविधानसभाया म्याद थप मयायेगु पक्षय् दुगु नेपाली कांग्रेसं वर्तमान सरकार विघटन जूसाः म्याद थप यायेगु सर्त न्ह्यने हःगु दु ।
प्रधानमन्त्री झलनाथ खनालनाप थौं सुथय् प्रधानमन्त्री निवास बालुवाटारय् जूगु खँल्हाबंलाय् कांग्रेस उपसभापति रामचन्द्र पौडेलं उगु सर्त तयादीगु खः । वय्कलं माओवादी व एमाले दथुइ जूगु न्हय्गू बुँदे सहमतिया जगय् निर्माण जूगु वर्तमान सरकार विघटन यानाः राष्ट्रिय सहमतिया सरकार गठन यायेमाःगु धयादिल ।
जेठ १४ गते न्ह्यः हे शान्ति व संविधान निर्माणया निश्चित खाका, माओवादी लडाकु समायोजनया मोडालिटी लगायत विषयलय् नं सहमति जूसाः कांग्रेसं म्याद थप यायेत ग्वाहालि याइगु खँ पौडेलं धयादिल ।
थ्वस्वयां न्ह्यः कांग्रेस सभापति सुशील कोइरालां म्हिग जूगु छगू ज्याझ्वलय् नं राष्ट्रिय सहमतिया सरकार निर्माण जूसाः म्याद थप यायेफइगु खँ धयादीगु खः ।
थ्वहे दथुइ संविधानसभाया म्याद थप यायेत प्रधानमन्त्री खनालं राजनीतिक नापलाय्गु ज्याः तीव्र यानादीगु दु । वय्कलं म्हिग माओवादी नायः पुष्पकमल दाहाल 'प्रचण्ड'यात नापलानादीगु खःसा थौं पौडेल नापं नेपाल सद्भावना पार्टी, राष्ट्रिय जनमुक्ति पार्टी, नेपाः राष्ट्रिय पार्टी लगायत दलया नेतातय्त नापलानादीगु खः ।
