आन्दोलनरत पुचःतनाप वार्ता यायेत समिति नीस्वन
थीथी पुचलं न्हूगु संविधानय् थःथःगु माग सम्बोधन जुइमाःगु माग याना: आन्दोलन यानाच्वंगु इलय् सरकारं अज्याःगु पुचःनाप वार्ता यायेत छगू समिति नीस्वंगु दु ।
मन्त्रिपरिषद्या शुक्रवाः च्वंगु मुँज्यां बिना विभागीय मन्त्री घनश्याम भुसालया संयोजकत्वय् स्वम्ह दुजः दुगु समिति नीस्वंगु खः । उगु समितिइ शान्ति मन्त्री विश्वनाथ साह व कृषि मन्त्री हरिनारायण यादव दुजः कथं च्वंगु दु ।
आदिवासी जनजाति लगायत मेमेगू पुचलं गणतन्त्र, संघीयात, धर्मनिरपेक्षता लगायतया माग तयाः बन्दया ज्याझ्वः तकं न्ह्याकेवं उकियात सम्बोधन यायेत सरकारं वार्ता समिति नीस्वंगु खः ।
अथेहे मन्त्रिपरिषदया मुँज्यां पेट्रोलियम पदार्थया सहज आपूत्ति, मूल्य समायोजन व आयल निगम सुदृढीकरणया यायेत नीस्वंगु समितिं लःल्हाःगु प्रतिवेदन कार्यान्वयन यायेगु निर्णय याःगु दु । उगु प्रतिवेदन कार्यान्वयन यायेगु जिम्मा वाणिज्य तथा आपूर्ति मन्त्रालययात बिउगु दु ।
उगु प्रतिवेदन कार्यान्वयनया अनुगमन यायेत मुख्यसचिव माधव घिमिरेया संयोजकत्वय् गृहसचिव गोविन्द कुसुम व कानुनसचिव माधव पौडेल दुथ्याःगु समिति नं नीस्वंगु दु ।
