जन्ति वयाः डुंगाय् चाःह्यूपिं प्यम्ह सित
यलया धापाखेलसं च्वंगु नागदहसं डुंगाय् दुनाः प्यम्ह मनूत सीगु दु । घाःपाः जूपिं निम्हसित उद्दार यानाः पाटन अस्पतालय् वासः यायेगु नितिं यंकूगु दु । डुंगा असन्तुलित जुयाः फाताः पुलाः येँया नागढुंगासं च्वंम्ह नीछदँया राजकुमार थापा, झिंन्हय्दँया मिलन बस्नेत, नीदँया सृजना कार्की व नीदँया हे श्याम कुँवर सीगु प्रहरीं जानकारी ब्यूगु दु ।
नागढुंगापाखें धापाखेलय् जन्ति वंपिं मध्ये झिम्ह न्ह्यइपुकेगु नितिं डुंगा बालं कयाः बोटिङय् वंगु खः । मेपिंत धाःसा स्थानीय बासिन्दा व मेपिं जन्ति वःपिंसं हे सकुशल उद्दार याःगु खः । निगः डुंगाय् वंपिं मध्ये छगलय् लः जायेवं मेगु डुंगाय् तिंन्हुगु इलय् दुर्घटना जूगु चापागाउँ वृत्तया प्रहरी नायब निरिक्षक प्रमोद खरेलं जानकारी बियादीगु दु ।
न्हिनय् छताः त्या इलय् घटना जुइवं हे शसस्त्र प्रहरीया दक्षिणकाली गणया पुचलं डुंगापाखें अंकुश तयाः सीपिं मनूत लिकाःगु खः । प्यम्हं सीपिं पिने हयेधुंकाः जन्ति व सीम्हसिया थःथितिपिंसं सुरक्षाया उपाय मछ्यसे जोखिमपूर्ण ढंगं डुंगा न्ह्याकीपिंसं कारबाही यायेमाःगु माग तयाः नागदहसं प्रदर्शन याःगु खः ।
