म्याद जक थपे यानाः छु यायेगु? : कोइराला
नेपाली कांग्रेसया सभापति सुशील कोइरालां राजनीतिक दलत दथुइ अविश्वासया वातावरण दुगुलिं संविधानसभाया म्याद जक थपे यानाः छुं मजुइगु खँ धयादीगु दु ।
'राजनीतिक दलत दथुइ विश्वासया वातावरण मदुतले व माओवादी इमान्दार मजुइकं झिंदँ म्याद थप याःसां संविधान वइमखु' वय्कलं धयादिल, 'थज्याःगु इलय् म्याद जक थपे यानाः छु यायेगु?'
रिपोटर्स क्लबं वय्कःया महाराजगञ्जस्थित छेँय् शुक्रवाः याःगु पत्रकार सम्मेलनय् सभापति कोइरालां राजनीतिक सहमति मजुइकं कांग्रेस संविधानसभाया म्याद थप यायेगु पक्ष मदुगु धयादिल । वय्कलं राष्ट्रिय सहमतिया सरकार गठन जुसाः जक संविधानसभाया म्याद थप यायेत कांग्रेस तयार जुइगु स्पष्ट यानादिल ।
वय्कलं सरकारं संविधानसभाया म्याद थप यायेत संसदीय सचिवायलय् दर्ता याःगु प्रस्तावं दलत दथुइ अझ अप्वः असमझदारी व अविश्वास ब्वलंकीगु धयादिल । माओवादी इमान्दार जूसाः शान्ति प्रक्रिया न्हय्न्हुया दुने हे निष्कर्षय् थ्यनीगु दावी नं वय्कलं यानादिल ।
