तस्करया ध्यबायात कयाः प्रहरी दथुइ ल्वापु
येँ (सन्ध्या टाइम्स)/जब ध्यबाया खँ वइ तब महाद्यवं नं स्वंगः मिखा कनी धाइ। अथे हे धाये थें आः नकतिनि नं तस्करतय्गु ध्यबायात कयाः स्वय्म प्रहरीतय् दथुइ हे ल्वापु पिहां वःगु दु ।
तस्करीया ध्यबा काललिब यायेगु विषयय् विवाद जुयाः प्रहरीतय् दथुइ ल्वापु जूगु खः। पर्साया ठोरी गाविसय् च्वंगु इलाका प्रहरी ज्याकुथी उगु ल्वापु जूगु खः ।
प्रहरी सहायक निरीक्षक कृष्ण साह व छम्ह प्रहरी जवान दथुइ ध्यबा इना कायेगु विषयय् विवाद जुयाः वंगु चान्हय् ल्हाःल्हाः तयाः दागादुगु हे यायेमाःगु अवस्था थ्यंगु खः।
ठोरी नाकाय् जुइगु अवैध काराबारपाखें वइगु ध्यबा इना कायगु खँय् उमि दथुइ ल्वापु जूगु खः। अधिकृतया च्वय् च्वंगु तहया प्रहरीतय्सं जक ध्यबा इना काल धकाः जवानत आक्रोशित जुइवं अथे ल्वापु जूगु खः। तर प्रहरी ज्याकुथिं धाःसा अय्लाः त्वनाः उगु ल्वापु जूगु खँ धाःगु दु।
प्रहरीं उगु घटनायात कयाः माःगु अनुसन्धान यासें दोषीयात कारवाही यायेगु खँ धाःगु दु। स्थानीय मनूतय्सं अन तस्करया ध्यबायात कयाः प्रहरीतय् दथुइ ल्वापु जूगु खः धकाः दु ।
