झापाय् नेवाः खलःया अधिवेशन
झापा (सन्ध्या टाइम्स)/पासा मुना पुचः नेवाः खलः बाहुडाँगीया न्याक्वःगु अधिवेशन नकतिनि छगू ज्याझ्वः यासें क्वचाल ।
खलःया नायः सुकुमार प्रधानया सभापतित्वय् जूगु उगु ज्याझ्वलय् पाहांपिं सुन्दरी श्रेष्ठ, निलम श्रेष्ठ, केसी श्रेष्ठ, हेबु प्रधानपिंसं नुगःखँ तयादीगु खः ।
मूपाहां नेवाः देय् दबू झापाया नायः कृष्ण उदासं खलःपाखें थःगु हे २ कठ्ठा जग्गाय् भिंद्यःया देगः दयेकूगु खँय् सुभाय् बियादिल। लिसें नेवाः सहकारी संस्था चायेकाः सफल जूगुलिं नं भिंतुना बियादिल। वय्कलं न्ह्यःने वयाच्वंगु राष्ट्रिय जनगणना बारे नं बःचाहाकं चर्चा यानादिल ।
उगु हे ज्याझ्वलय् नेवाः मिस्तय्त छप्पँ यायेगु लागिं प्रमिला प्रधान संयोजक जुयादीगु खुम्ह दुजः दुगु नेवाः मिसा दबू नं नीस्वन ।
उगु हे ज्याझ्वलय् उग लागाय् भाषा, संस्कृति व समाज सुधारया ज्याय् योगदान बिउपिं प्यम्ह व्यक्तित्वयात मरणोपरान्त सम्मान यायेगु ज्या नं जूगु खः ।
मेखे नेवाः समाज कल्याण गुठी भद्रपुरय् नं २१ क्वःगु अधिवेशनपाखें जय श्रेष्ठया अध्यक्षताय् न्हूगु कार्यसमिति ल्यज्या जूगु दु ।
