देय्न्यंक जनजातितय् बन्दया प्रभाव
आदिवासी जनजाति आन्दोलन राष्ट्रिय मोर्चां आव्हान याःगु नेपाल बन्दया प्रभाव देय्न्यंक लाःगु दु । बन्दया हुनिं स्वनिगः लगायत देय्न्यंकया जनजीवन प्रभावित जूगु दु ।
न्हूगु संविधानय् गणतन्त्र, संघीयता, धर्मनिरपेक्षता नापं आदिवासी जनजातितय् अधिकार सुनिश्चित यायेमाःगु माग यासें मोर्चां बन्दया आव्हान याःगु ख: । बन्दया झ्वलय् प्रहरीं येँया थीथी थासं पीम्ह प्रदर्शनकारीतय्त ज्वंगु दु ।
प्रहरीं आदिवासी जनजाति महासंघया उपाध्यक्ष डोजाङ शेर्पा, सचिव अर्जुन याखा, कोषाध्यक्ष डिकेन्द्र राई लगायतयात ज्वंगु दु । प्रहरीं पीम्ह प्रदर्शनकारीतय्त जक ज्वंगु धाःगु दुसाः महासंघं प्रहरीं ज्वनायंकूपिनि ल्याः वस्वयां अप्वः जूगु दावी याःगु दु ।
बन्दकर्तातय्सं सुथंनिसें येँया रन्तपार्क, पुतलीसतक, कलंकी, बालाजु, चाबहिली नापं पोखरा, पाल्पा, चितवन, बर्दिया, नेपालगञ्ज लगायत थीथी थासय् प्रदर्शन याःगु दु । बन्दया हुनिं देय्न्यंकया शैक्षिक संस्था, पसः, ज्याकू, कलकारखाना आदि बन्द जुयाच्वंगु दुसाः सवारीसाधन पूर्णरुपं ठप्प जूगु दु । बन्दं यानाः कक्षा १२या जाँच तकं प्रभावित जूगु खः ।
थौंया बन्द लितकायेत नेपाःस्थित युरोपेली नियोग, नेपाल पर्यटन दँ २०११या सचिवालयं इनाप याःगु खः । उखे नेवाः स्वायत्त राज्य मंकाः संघर्ष समितिं नं मोर्चाया माग प्रति समर्थन प्वंकूसें स्वनिलय् थौं बुंगद्यःया जात्रा जूगुलिं स्वनिगलय् बन्द मयायेत इनाप याःगु खः ।
