थःगु भाय् व संस्कृति प्रति आप्पाया मतिना
येँ (सन्ध्या टाइम्स)/२१ क्वःगु सगरमाथाया सफल आरोहण यानाः आप्पा शेर्पां हानं न्हूगु विश्व कीर्तिमान कायम याःगु दु। म्हिगः सुथय् बांलाःगु मौसमया फाइदा कयाः वय्कलं सगरमाथाया च्वकाय् पलाः तयादीगु खः। वय्कःलिसें अमेरिकाया क्रिस सुमाते, स्वीट्जरल्याण्डया ब्रुनो ग्रेमिअर व मेपिं स्वम्ह शेर्पात नं नापं च्वकाय् थ्यंगु खः। च्वकां लिहां वइबलय् आप्पां न्याद्वः किलो फोहोर नं मुंकाः ज्वना वइ ।
चरम गरिबीया कारणं १२ दँय् हे पर्यटकतय् भारी क्वबीगु ज्या शुरु याःम्ह आप्पां थौंकन्हय् सोलुखुम्बुया थामे गाविसया च्वंपिं शेर्पा मस्तय्त शेर्पा भाय्, शेर्पा संस्कृति ब्वंकेगु व स्कूलय् ग्वाहालि यायेत आप्पा शेर्पा फाउण्डेशन चायेकातःगु दु। वय्कः थः धाःसा अमेरिकाया उटाह राज्यय् च्वनाच्वंगु दु ।
चाउचाउ नयाः आरोहण
म्हिगः हे सगरमाथाया सफल आरोहण याःम्ह भारतया मिसाम्ह आरोही टिना मेनां (२५ दँ) च्वकाय् वनेत छन्हु पीगु झ्वलय् कर्पिनि टेन्टय् वनाः म्यागी चाउचाउ नयाच्वनागु खँ कंगु दु। ७२०० मिटरय् आकाझाकां तसकं फय् वयाः थःपिनिगु टेन्ट पुइका यंकूगुलिं कर्पिनि टेन्टय् च्वनागु व अन थःपिंत बिउगु छपुरि म्यागी चाउचाउ सरदार व थम्हं बछिबछि इनाः नयागु खँ कंगु दु।वयां लिपा कन्हय् कुन्हु कर्पिंसं वनेमते धायेक धायेक हे आरोहण शुरु यानाः च्वकाय् पलाः तयागु खँ नं वं धाःगु दु। सगरमाथा च्वकाय् पलाः तःम्ह टिना उत्तर भारतया हे न्हापांम्ह मिसा आरोही खः ।
