बौद्ध न्ह्यसः-लिसः कासा
येँ (सन्ध्या टाइम्स)/२५५५ क्वःगु बुद्ध जयन्तीया लसताय् भगवान बुद्धया सन्देशय् आधारित ज्ञान, व्यावहारिक व नैतिक शिक्षा ब्वनेकुथिया ब्वँमिपिंत बीमाः धइगु मू ताः तयाः अन्तर माध्यामिक बौद्ध न्ह्यसः-लिसः कासा आः नकतिनि हे क्वचाःगु दु।गणमहाविहारय् जूगु उगु कासा सोभित भन्तेया सभापतित्वय् न्ह्याःगु खःसा कासाय् भद्दिय भन्ते व उदयभद्र भन्तेपिं ल्यज्या पुचलय् च्वनाबिज्याःगु खः ।
ज्याझ्वलय् मूपाहाँकथं झाःम्ह समाजसेवी मोतिलाल शिल्पकारं थौंया ईकथं बुद्धया सिद्धान्त ब्वँमिपिंसं ग्रहण याये फयेकेमाःगु खँय् बः बियादिल। बुद्धया सिद्धान्त थःगु जीवनय् छ्यले फःसा जक उकिया सार्थकता दइ धइगु खँ नं वय्कलं कनादीगु खः। कासाय् नेपाल आदर्श माध्यमिक विद्यालय न्हाप, कान्ति ईश्वरी राज्यलक्ष्मी माध्यमिक विद्यालय लिउ व विश्व निकेतन लियांलिउ लाःगु खःसा सिरपाः त्याकूपिं ब्वँमिपिंत मूपाहाँ शिल्पकारं सिरपाः लःल्हानादीगु खः। ज्याझ्वलय् रमना श्रेष्ठं सुभाय् बियादीगु खः ।
